رُزق الفنان حسن الرداد، بمولوده الأول (فادي) من زوجته الفنانة إيمي سمير غانم، منذ أيام قليلة، والذي أطلق عليه هذا الاسم تيمنًا بشقيقه الراحل.
وقال الرداد، في تصريحات سابقة عن شقيقه الراحل “فادي”، حيث قال: “كان معايا وعملنا حادثة اتوفى هو على طول.. إحنا كنا راجعين من القاهرة الساعة 7 تقريبًا وكان فيه الريس كان عامل بيحضر حاجة في قاعة المؤتمرات في مدينة نصر فاتحجزنا حوالي ساعة ونص تحت الكوبري كده”.
وأضاف: “طبعًا كل العربيات كانت مزنوقة وتعبانة بعد ساعة ونص ساعتين كمان طلعنا على طريق الاسماعيلية فكل الناس كانت تعبانة ومجهدة وكده.. وكان فيه عربية تريلا السواق نايم تقريبًا أو حاجة دخل فينا فالحمد لله يعني.. هي حاجة مش متوقعة أصلًا خالص.. وسبحان الله أنا أمي كانت قاعدة جنبي في العربية وأخويا كان قاعد ورا فأخويا قال لماما ارجعي أقعدي ورا عشان تفردي جسمك وتقعدي براحتك وأقعد أنا قدام فسبحان الله دي حاجات كده”.
وتابع: “وهو ما شاء الله كان بيصلي الخمس صلوات في الجامع وكان بيصوم اتنين وخميس على طول وكان بيحفظ قرآن.. كان شخصية غيري خالص.. أنا بصلي طبعًا بس هو كان شخص ملتزم والحمد لله هو عمره بقى”.
واستكمل: “أنا طبعًا ما نسيتوش خالص لغاية دلوقتي كل لحظة في حياتي أنا فاكره فيها.. كل لحظة نجاح أنا فاكره فيها.. فات زمن بس أنا مش حاسس الزمن لغاية دلوقتي أنا بالنسبة لي العمر متوقف عند التاريخ ده.. أنا طبعًا مفتقده جدًا ومفتقد كل لحظة حلوة أنا اتمنيت يبقى معايا فيها أنا حياتي كلها كانت معاه في كل حاجة فحصلي يعني الحمد لله”.
