حلت الإعلامية الدكتورة هالة سرحان، ضيفة على الإعلامية أسما إبراهيم، مقدمة برنامج “حبر سري” الذي يذاع عبر قناة “القاهرة والناس” خلال شهر رمضان 2022.
وقرأت الإعلامية الشهيرة، سؤال فريق الإعداد الذي قال “مين الضيف اللي تسبب في توتر هالة سرحان وقالت بينها وبين نفسها ياريتني ما استضفتك؟ لترد قائلة: “بصي أنا عمري ما بندم ولا عمري أقوله يا ريتني ما استضفتك بالعكس أنا استضافت ناس كتير جدًا أنا مختلفة معاهم جذريًا لكن أهم حاجة في شغلتنا إن حتى لو انتي مختلفة معاه جذريًا لازم تحبيه.. يعني تحبيه في الساعة ونص ولّا الساعتين بتوع البرنامج بحيث تديله الفرصة يتكلم تديله الفرصة يقول الكلام اللي مش عاجبك وتردي لكن في نفس الوقت أنا مبحبش أقول إن فيه ضيف ندمت عليه لكن ندمت لسلوكيات بعض الأشخاص”.
وأضافت هالة، قائلة: “يعني مثلًا كان عندي حلقة أنا دايمًا بجيب نخبة من التيارات المختلفة في المجتمع والأحزاب المختلفة فكان معايا الفنان الكبير صلاح عناني، وكان معايا أظن يوميها واحد من الإخوان كنا بنديهم فرصة وياريتنا ما اديناهم فرصة إن هما يطلعوا ولا يتكلموا ولا ينطقوا خالص.. وكان فيه اتنين مثقفين موجودين واتكررت الحكاية دي مع صلاح عناني ومع الأستاذة فاطمة ناعوت إنه طلع منه كلمة كده وهو قاعد ومجعوص كده.. صلاح عناني قاله أنتوا متهمين بكذا وكذا وانتوا هتخربوا البلد وانتوا هتعملوا.. قاله انت ما تكلمنيش أحنا أسيادكم.. قولتله نعم يا أخويا! أسياد مين يا حبيبي بتتكلم مع مين؟ راح قايم صلاح عناني وطبعًا ثار جدًا من الكلمة وأنا الحقيقة ثورت بس كان لازم أحوش بينهم فبقيت واقفة عمالة أحلق”.
وتابعت هالة: “بعدين بقى عملت بريك وقولتله انت لازم تعتذر فورًا فقالي يعني.. قولتله مش هتعتذر فمنتش قاعد ومش هنسكت ع الحكاية دي لأنها كلمة خطيرة أسيادكم يعني شوفي الغل اللي عندهم.. فالمهم اعتذر واتصالحوا والصلح خير وعدت الليلة.. إحنا بنقدم إننا ناس عقلانيين وكنت بفكر وناس كتير كانت بتفكر من المثقفين إن يبقى فيه حياد وندي جميع الأصوات فرصة يتكلموا فإحنا هنرد عليهم إحنا مش هنسكت لهم. وأحيانًا أنا كنت ببقى متعمدة إني أجيبهم عشان يوقعوا نفسهم في مشاكل.. الكلام اللي بيقولوه بيخلي الناس تجري منهم يعني الناس تخاف.. لما واحد يقول كده من أولها إحنا أسيادكم انتوا مين؟ أسياد مين؟ مين أسياد الشعب المصري؟ لأ بقى انتوا مش هتحكمونا يعني دي كانت حاجة كويسة إنهم كانوا بيفضحوا نفسهم”.
