ماجدة خير الله تفتح النار على حلا شيحة: فنانة محدودة الموهبة.. وغيابها أو وجودها لا يترك أثر

هاجمت الناقدة الفنية ماجدة خير الله، الفنانة حلا شيحة، التي أعلنت مؤخرًا رغبتها في العودة للفن، بعد خلع الحجاب الذي ارتدته لمدة أقل من عامين بعد آخر أفلامها “مش أنا” الذي عرض في موسم صيف 2021.

حيث قالت الناقدة الشهيرة في مداخلة هاتفية مع الإعلامية مروة صبري، مقدمة برنامج “قعدة ستات” الذي يعرض عبر قناة “اليوم”: “أنا رأيي إن غيابها أو وجودها لا يترك أثر.. وإحنا بندي قيمة كبيرة جدًا بالحديث عن وجودها أو اختفائها.. هي فنانة محدودة الموهبة وفيه عشرات عشرات من الممثلين والفنانين الموهوبين بجد محتاجين إلى فرص”.

وأضافت: “فيه فنانات سواء خريجات معهد أو مش خريجات معهد ولكن موهوبين جدًا وأخدوا فرص وأثبتوا وجودهم أو لسه ناس تانية ما خدتش فرص ولكن موهوبين.. إحنا بنضيع وقت مع حد مش مهتم بالفن.. مش مهتم بالمهنة وبالعكس بيسيء إليها بيخلي الناس تعتقد إن المهنة دي شغلانة كده أي حد يقدر يخش فيها ويطلع زي ما هو عايز”.

وتابعت: “هي محدودة الموهبة الحاجات اللي هي اشتركت فيها نجاحها يعني هي كانت موجودة مع عادل إمام وشريف منير تفتكري هي اللي كانت موقفة الفيلم على رجله.. لأ طبعًا حتى في اللمبي.. اللمبي وعبلة كامل.. يعني هي كان حظها إن هي تتواجد في مجموعة أفلام معاها ناس هما اللي كانوا شايلين الحكاية.. هي كانت مجرد بنت لطيفة شكلها حلو.. خلاص الكلام ده كان من 18 سنة خلاص دلوقتي لم تعد البنت اللطيفة في 15 مليون واحدة طلعوا بعد كده موهوبين وحلوين وسنهم مناسب”.