حجاج عبد العظيم: حرامي سرق الكافيه بتاعي في نهار رمضان وكان بينقل الحاجات زي ما يكون بينقل عفش بنت خالته

حل الفنان حجاج عبد العظيم، ضيفًا على الإعلامية ياسمين عز، في حلقة أمس الأحد من برنامجها “كلام الناس” الذي يعرض عبر قناة “MBC مصر”.

وروى حجاج، خلال الحلقة واقعة سرقة الكافيه الخاص به في نهار رمضان، حيث قال: “الساعة 7 الصبح لقيت الشاشات اللي موجودة كلها في الكافيه اتشالت بتاع 3 شاشات وشايل لاب توب والحاجات بتاعت السيستم وشوفناه ع الكاميرا وكاميرا وكان هذا الحرامي بيطلع لي لسانه يعني بيبص لي كده في الكاميرا يعني يالا روح بلغ أنا الحرامي”.

وأضاف: “وبينقل الحاجات زي ما يكون بينقل عفش بنت خالته يعني آه والله ويشيل ويلف ويغلف ويودي العربية بتاعته وقعد يفكر كده شوية.. وما شربش حاجة لكن واضح إن هو يا عيني كان صايم حرامي صايم ربنا يتقبل منه.. هو كان صايم فمرضيش يشرب.. ما جيبتهوش وعملت مكافأة للي يقبض عليه لكن راح.. ولغاية دلوقتي أنا عايز أشوفه وأقعد معاه.. ياريت يا حرامي نقعد مع بعض ونشرب فنجان قهوة.. لو قعدت معاه هقوله إيه الجرأة دي؟!”.