“بيتفتح عليا بالمفتاح وأنا نايمة”.. فريدة سيف النصر: «بتعرض للسرقة عيني عينك ومش عارفة أعمل إيه»
صرحت الفنانة الجميلة فريدة سيف النصر، بأنها تتعرض للسرقة من مُدبرة منزلها، وأشارت بأن هذه لم تكن المرة الأولى، وأنها قامت بسرقتها أكثر من مرة، ولكنها لم تقم بإتخاذ أي إجراء قانوني ضدها.
وكتبت الفنانة، منشور عبر حسابها الرسمي على موقع التواصل الإجتماعي “فيس بوك”، موضحة: “لما بيكون عندك شخص نافع أوي، وده علشان أنا مش بحب خالص الكلاب، وكل شوية تلاقي حاجات بتضيع من عندك.. بجد مش هزار وحاجات واضحة أوي، وده بمعنى هدوم مش أي حاجة لازم ينقصوا ويتاخدوا على مرتين.. إختفاء قصري، وترجع بعد شوية ترمي ليك نص فإنت تتخيل إنك مدورتش كويس وفجأة اختفاء كامل”.
وواصلت فريدة: “وده طبعاً غير المفروشات.. أقسم بالله أطقم كاملة بمخداتها، وده غير النظارات والجزم وأدوات المطبخ والإكسوارات.. بجد والله مبقاش في عندي حاجة كاملة على بعضها، ومش لاقية حد تاني علشان أشك فيه ممكن يعمل حاجة زي دي”.
وتابعت الفنانة: “وأول لما كانت تقولي إنها هتغير مكان الحاجة بحجة النظام، كنت بعرف إنها هتاخدها على طول أو تلخبط الأدراج على بعضها وألاقي كل حاجة متكعبلة، وأنا ساعتها بتلخم في شغلي وبعدها بلاقي حاجات اختفت بالفعل.. مش عارفة أعمل إيه؟، وأكتر من مرة كنت عاوزه أواجهها بس للأسف مش بحب أحرج حد، ولا أمشيها وأحتاس شوية لأنها عيلة على بعضها وممشيين مصلحتي، وفي ناس قالت ليا أروح عندها على فجأة، وبجد أنا مش عارفة أعمل إيه؟”.
وأضافت: “وحقيقي زهقت وتعبت ومحتارة سرقة علني قدام عيني ومش عارفة أعمل حاجة، وطبعاً بيتفتح عليا بالمفتاح وأنا نايمة ومش دارية بحاجة، ومشكلتي من زمان إني بدي الأمان لكل الناس.. والله العظيم تعبت أوي.. بجد حسبي الله ونعم الوكيل، وياريت حد يفيدني ويقولي أعمل إيه؟”.
