إبراهيم عيسى: جماهيرية الشيخ الشعراوي خاطئة.. والشعب المصري حول أدهم الشرقاوي الحرامي لبطل شعبي

أثار الإعلامي إبراهيم عيسى، جدلًا واسعًا بسبب التصريحات التي أدلى بها بشأن فضيلة الشيخ الراحل محمد متولي الشعراوي، خلال أحدث حلقات برنامجه “حديث القاهرة” الذي يعرض عبر قناة “القاهرة والناس”.

وقال عيسى: “أنا عارف جماهيرية واسعة طبعًا للشيخ الشعراوي لا ينكرها أحد بس جماهيرية خاطئة.. هي الجماهيرية أو الشعبية دي المفروض تبقى مصادرة لحقك في التقييم التاريخي للناس والتقييم لأفكارهم وآرائهم ورؤاهم يعني جمال عبد الناصر له ملايين المحبين والعاشقين واللي ما صدقوش عليه أي نقد من أي نوع هل ده يمنع أنك تنتقد سياسات عبد الناصر أو تنتقد مواقف له ما يمنعش”.

وأضاف: “كل شخصية من دول بيبقى حواليها ألتراس ممنوع الاقتراب أو التصوير ممنوع النقد والاقتراب.. ولأ ده ما بيلغلطش.. ده عظيم ده رهيب ده احسن حاجة في الدنيا لأ ده إهانة للرموز لأ واتهام لكل نقد بأنه بقى مأجور خاين عميل كافر ماسوني أي حاجة.. إنما في تقبل للأفكار طيب؟ في تقبل للنقاش لأ لازم عبوة التقدير والتقديس دي وإحنا مجتمع يا أبيض يا أسود مع حالة التقديس والتعصب الأعمى لشخصيات أو لأفكار”.

وتابع: “إذن شعبية الشعراوي لأصحابه لمحبيه إنما دي مش مصادرة لمناقشة أفكار الشعراوي.. بل بالعكس اللي بيحبوه لازم يفصلوا أكتر ممكن تفصل أكتر بين محبتك له كشخص عام أو إنك انت تقول أفكاره وآراءه إنها نهائية ومحسومة أو تقرر إنك انت ما تسمعش أي نقاش حولها وتقربه من منطقة الولي وبرضه مصر شعب عجيب يعني الشعب المصري يتميز بانفراده واحد زي أدهم الشرقاوي ده لص حرامي وهجام وقاطع طريق الشعب المصري قرر يعمله بطل ويقدمه إنه ضد الإنجليز وهو أفاق ونصاب لكن تقول إيه بقى نحترم الشعب ونحترم السيرة الشعبية”.

واستكمل: “معظم اللي بيعلق صور الشيخ الشعراوي في الميكروباصات هتلاقي في أتوبيس شركة عند الحلاقين عند محلات العصير عند الطبقة الشعبية الشيخ الشعراوي كتميمة كأيقونة بيتباركوا بيه يعني 90 % منهم ما تأملوش في كلامه”.