كشفت الفنانة داليا البحيري، عن المعاناة التي يعانيها الممثلين في عملهم، مؤكدة أن مهنة التمثيل مهنة غير إنسانية، حيث قالت في تصريحات تليفزيونية: “ليا رأي في الفن.. قولت التمثيل مهنة قاسية جدًا.. ما قولتش غير آدمية.. قولت لا إنسانية الحقيقة.. هما فعلًا سألوا عن إيه أصعب مهنة في العالم لقوا إن أصعب مهنة ممكن يتعرض ليها الإنسان هي عمال المناجم.. اللي بيشتغلوا أوقات طويلة في درجة حرارة قاسية جدًا”.
وأضافت: “لقوا تاني أصعب مهنة بعد عمال المناجم على طول هو الممثل.. ليه بقى لإن أنت ممكن تمثل بلبس صيفي.. يعني انت بدأت العمل في الصيف أو العمل حدوتة في الصيف ويدخل عليك الشتا.. فأنا حصلي كده.. بتبقى لابس لبس خفيف جدًا واقف في درجة حرارة تحت الصفر.. واقف بتمثل والمفروض إن انت مبتسم مثلًا وحاسس إن انت دفيان والدنيا حر وانت أساسًا متلج”.
وتابعت: “والعكس صحيح ممكن تبقى لابس شتوي في عز الحر.. ممكن تبقى انت عندك مشكلة في البيت مثلًا وانت تعبان نفسيًا جدًا والموضوع ده مؤرقك بس لازم تطلع تعمل مشهد كوميدي.. ويبقى دمك خفيف ويبقى مودك لذيذ.. الجهاز العصبي بيتعب جدًا.. حاجة في منتهى الصعوبة بالنسبة لي.. وممكن يبقى العكس.. انت مودك جميل جدًا ولذيذ وصاحي مبسوط ومقبل ع الحياة ورايح عندك مشهد لازم تتأثر فيه أو تعيط أو تدخل في مود كئيب.. كل ده غير طبيعة البشر”.
