وجهت الإعلامية بسمة وهبة، من خلال حلقة أمس الإثنين من برنامجها “90 دقيقة” الذي يذاع عبر قناة “المحور” رسالة قوية للفنان محمد رمضان، عقب مقتل طالبة جامعة المنصورة على يد زميلها الذي طعنها بسلاح أبيض لرفضها الزواج منه.
وقالت: “بدون زعل أنا مش بوجهلك اتهام يا محمد رمضان.. ولكن أنا عايزة أقول ليك وأنت مؤثر محمد رمضان انت مؤثر.. ومؤثر في هذا الجيل مؤثر كبير وليك دور كبير أنا بطلب منك مش هقولك أبعد عن أدوار الشر والبلطجة والدم لأ هطلب منك إنك أنت خليك في الأدوار اللي الشباب بيقلدك فيها الأدوار الكويسة الإيجابية اللي تؤثر تأثير كويس فيهم”.
وأضافت: “أنا عارفة رغم كل هذه الحالة والهالة اللي حواليك اللي ما بتعجبش ناس كتير ولكن انت طيب القلب من جوه وانت حد جدع فأنا عايزاك إنك انت تخدم هذا الجيل وتعمل مبادرة لإنك من أكتر الفنانين تأثيرًا مع هذا الجيل أرجوك حاول تعمل حاجة إنك تخدم هذا الجيل لإن هما في منحنى دلوقتي”.
وتابعت: “أنا واحدة من الناس اللي كنت بهاجم محمد رمضان كتير كتير ولكن في أفعاله وليس في شخصه.. لكن أنا شوفت محمد مرتين تلاتة في مناسبات يعني أنا مش مصدقة كمية الحب اللي من الناس وكمية الإعجاب من الناس.. فأنا عايزة أترجم ده واستغله عايزين نبعد عن القتل والدبح والدم والحاجات دي.. والدراما والمسئولين عن الدراما أنا عايزاهم يمشوار في خط قضية الوعي.. دي مهمة جدًا وده دورنا كلنا بنعتبر مسئولين”.
