أحمد صيام: كنت خايف من دخول بنتي التمثيل بسبب التنازلات اللي بتقدمها الفنانات.. بس دلوقتي هي تقدر تحمي نفسها

كشف الفنان أحمد صيام، عن تخوفه من دخول ابنته (بسنت) الوسط الفني في صغرها، حيث قال في تصريحات تليفزيونية: “في ناس بيبقوا محيطين بالفن أو دخلوا المهنة من أبواب خلفية لهم سلوكيات مش لطيفة يعني مش عايز أصرح أوي بالجملة”.

وأضاف: “الضغوط على البنات بالتحديد الممثلات بالتحديد في شغلانتنا دي بتبقى قاسية أوي وشديدة أوي.. واللي بيقدر يثبت نفسه فيها بيبقى حد شجاع أوي.. الحمد لله عندنا مجموعة من الفنانات الفاضلات اللي عندهم الشجاعة إنهم قدروا يثبتوا نفسهم ولم يتنازلوا لحظة”.

وتابع: “اللي موهوب أوي مش هتلاقي عنده التنازلات دي.. الشاطر أوي مش هتلاقي عنده التنازلات دي لإنه عنده يقين في موهبته.. إنما اللي داخل عايز يهزر وعايز يشتهر وبتاع أه وماله هيتنازل عشان يشتهر.. فيه مش هننكر ونحط دماغنا في الرمل.. لأ فيه ناس دخلت الشغلانة من أبواب خلفية وبقوا موجودين ع الساحة”.

واستكمل: “فأنا كنت متخوف من ده بالنسبة لبسنت، إنما لما كبرت بقى واتخرجت من الجامعة وبقى عندها شخصية خاصة هي تقدر تحمي نفسها.. طيب تخشي بس كإنك ما تعرفينيش.. ما تنتظريش إن أنا هدعمك يعني.. ومش هقدر أقول وجهة نظري فيكي لإن شهادتي هتبقى مجروحة”.