“أنا مش متضايق من الجمهور وبحب حبهم ليا”.. أحمد العوضي: «رفضت أشارك في سره الباتع مع خالد يوسف بسبب وعدي لـ ياسمين»
كشف الفنان أحمد العوضي، كواليس من حياته الفنية وعلاقته بزملائه بالوسط الفني، وتحدث عن المسابقة التي قرر أن يُجريها بين جمهوره، وتحدث أيضاً عن أسباب عدم مشاركه بالمسلسل الشهير “سره الباتع”، للمخرج خالد يوسف والذي تم عرضه خلال الموسم الدرامي الرمضاني الماضي.
وأكد الفنان، أثناء استضافته ببرنامج “حبر سري”، والتي تقوم بتقديمة الإعلامية أسما ابراهيم، والمُذاع عبر فضائية “القاهرة والناس”، موضحاً: “لو نزلت في فيلم أمام الفنانة ياسمين عبدالعزيز هى اللي هتحقق إيرادات أكتر، وأنا هكون سعيد بكده وعاوزها تحقق إيرادات أكتر من أي شخص”.
وواصل العوضي: “ياسمين بتعمل كوميدي وأنا بعمل أكشن، وهى سهل إنها تحقق إيرادات أكتر مني 40 مرة، وبجد شخصية الخديوي هى الأقرب مني والمُحببة لقلبي، وحقيقي أنا مش قلقان خالص من المنافسة مع أي زميل آخر، وأنا بجتهد وبعمل شغلي بضمير وبسيب الباقي على ربنا”.
وحينما سؤل عن سبب عدم مشاركته بـ “سره الباتع”، رد: “في مسلسل سره الباتع كان المفروض دور حامد القديم والجديد اللي يعملهم فنان واحد، والمخرج خالد يوسف والمنتج تامر مرسي قالوا إني هأعمل الدورين، وبجد كنت مرتبط بكلمة مع زوجتي ياسمين، وإني هقدم معاها عمل هذا الموسم، وساعتها مكنتش لسه قررت إني هعمل (ضرب نار) أو أي عمل تاني، وعلشان بحب أحترم وعدي رفضت واعتذرت”.
وحينما سؤل عن النجومية وحب الجمهور، علق: “النجومية شئ مش دايم، وأنا مش بتضايق من الجمهور وبحب حبهم ليا، ولو شخص بيحبك مش هتحبه ليه وهتقلب وشك عليه ليه؟، وأنا شايف إن من حقه إنه يتصور معاك مهما كان طبيعة عملك لأنه بيحبك، والمفروض الواحد منا يزعل لما محدش يعبره.. ما ربنا كان مديك نعمة، وعلى رأي المثل البطران بيجيب قطران”.
