بعد انتهاء مباراة الزمالك وفريق صن داونز في النهائي الافريقى بتتويج الفريق الضيف رغم فوز الزمالك بهدف نظيف انهالت التعليقات على اداء الفريق في المباراة بين ناقدة ومساندة للفريق، وبطبيعة الحال لا يمكن أن يمر الموقف مرور الكرام من قبل الاعلامى عمرو اديب المعروف بانتمائه الشديد للفريق الابيض.
فقال عمرو اديب بعد المباراة:
احنا مش هنقعد نجيب مدربين يتعلموا فينا، احنا عاوزين مدرب كويس، عاوزين مدرب كبير، تعبنا بقى، عاوزين مدرب واحد يفضل يمسك الفريق، هو دا جمهور الزمالك اللى بيتبهدل على طول، بس هنفضل طول عمرنا كده ملطشة.. مش ممكن يعنى، دا الجمهور غلبان والله العظيم تلاتة، كان نفسنا النهاردة نقدم حاجة للبلد، إنما احنا مغلوبين الماتش هناك عشان مفيش تنظيم وتدريب كويس.
وتابع اديب في وصفه بعد المباراة:
رب ضارة نافعة، ولسه الدوري في أوله، عاوزين مدرب كويس وثبات للمدرب، دا نادى كبير، بالعشر سنين والـ14 سنة بين بطولة وبطولة، حرام الواحد تعب، نادى الزمالك مش ملطشة دا نادى محترم، دا قدرنا احنا ديما كده.. عارفين الفرق بينا وبين الأهلاوية بتبقى مسألة شاذة بالنسباله البطولة تضيع، لكن احنا بالنسبة لنا عادى، انما 49 سنة بأتضايق، وأنا بتفرج على الزمالك من أيام حمادة إمام لغاية حازم إمام وحازم إمام الصغير لغاية ما مشى، حضرت كل عيلة إمام.
اما عن جماهير الزمالك بعد المباراة فانهار البعض داخل الاستاد بالبكاء بضياع حلم البطولة السادسة الافريقية وهاجمت اعضاء رابطة الوايت نايتس المستشار مرتضى منصور رئيس النادي الذى تحدث عقب اللقاء مؤكدا أن فريقه يستحق البطولة من البداية وان سبب الخسارة هو السحر الاسود الذي قام به فريق صنداونز وقال ” اللى هيقول غير كده هديله بالجزمة “.
