السمك من الاكلات التى يعشقها الجميع وله عدة طرق عديدة ومختلفة في الطهى منها المشوى والمقلى والسنجارى
ونقدم لكم طريقه عمل السمك البوري سنجارى بطريقه مطاعم.
تحضير سمكه بوري كبيره قصيت الذيل والزعانف وكحت السمكه بالسكينه عشان اشيل كل القشر.
من عند بوق السمكه وبالمقص فتحت السمكه وفي اتجاه سلسلة الضهر.
نضفت السمكه من جوه ودعكتها بميه ودقيق وبعدين بميه وخل وكل ده بميه ساقعه وبسرعه عشان ما تتهريش.
عملت خلطه عباره عن:
٣ ملاعق كبيره ثوم مفروم
نص كوباية عصير ليمون
نص كوباية زيت
٣ ملاعق كبيره معجون طماطم
شطه
ملح فلفل كمون كزبرة ناشفه
باخد نص كمية الصوص وبحطها ع الخضار بعد مع شوحته على نار عاليه وسبكته مع بعض.
الخضار ده عباره عن:
كوباية بصل احمر متقطع حتت صغيره
كوباية طماطم متقطعه حتت صغيره
جزره مبشوره
كرفس متقطع حتت صغيره
قرن فلفل حار
فلفل رومي احمر واخضر متقطع حتت صغيره
* بشوح الخضار في نقطة زيت على نار عاليه وبحط عليه الصوص عشان يتسبك.
اول لما كل حاجه تتسبك بطفي النار وبحط ربع كوباية كزبره خضرا مفرومه.
بجيب صينيه كبيره وبحط ورق المونيوم وعليه ورق زبده وبعدين بحط السمكه مفتوحه.
بقفل ورق الزبده والفويل كويس حوالين السمكه
و بعدين بدهن السمكه بالجزء المتبقي من الصوص وبحط بعد كده الخضار المتسبك.
الفرن بيكون متسخن على اعلى درجه وبحط الصينيه في اوطى رف في الفرن.
السمك بياخد حوالي ٢٠ دقيقه وبعدين بشغل الشوايه ٥ دقايق عشان الوش يحمر.
