الرسم فن من الفنون المتعددة ومن أقدمهم، حيث يخرج الرسام أو الفنان أفكاره وثقافه عن طريق الرسم، فالفنان يعتبر الرسم أداة للتعبير عما يريد بالشكل الذي يراه عقله ويخرجه في صورة معبرة، فالفنان يستخدم كل ادواته وموهبته وأيضًا يستخدم الأحداث المحيطه بيه والبيئة الخارجية، ليخرج لنا في النهاية لوحة فنية تعبر عما يشعر بيه ويراه في عقله الباطن.
ضيفنا اليوم هو فنان النجوم، صاحب الريشه المعبرة، الفنان المصري مصطفى نشأت، في حوار خاص مع نجوم مصرية…
اولًا / من انت لمن لا يعرفكك؟
مصطفى نشات
مواليد محافظه البحيره مركز ايتاى البارود
٢٥ سنه
اتخرجت من كليه الحاسبات والمعلومات
مين كان بيشجعك ؟
الرسم بحبه من صغرى من وانا لسه في ابتدائى، واللى حببنى فيه اختى الأكبر منى لانها كانت بترسم هى كمان.
لما دخلت المدرسه مُدرسه الرسم، اكتشف انى برسم حلو وكانت مهتمه بيا جدًا ودايمًا كنت باخد مركز أول في الرسم على مستوى الاداره،
ودايمًا كانو المدرسين يشوفو رسمى ينبهرو بيه وكانو بيقولولى دايمًا يا فنان.
كان الرسم أول اهتماماتى من صغرى، لدرجه انى كنت بحوش من مصروفى علشان اشترى ادوات رسم.
و كان نفسى جدًا ادخل كليه فنون جميله بس معرفتش، ودخلت حاسبات ولما دخلت حاسبات قررت انمى موهبتى واتعرف على ادوات رسم جديده، لدرجه انى كنت بروح كليه فنون جميله جامعه اسكندريه علشان اسال طلبه فنون بتجيبوا الادوات منين، وفى مره من المرات دخلت حضرت معاهم محاضره الدكتور قالى انت مين انا أول مره اشوفك قلتله انا بحب الرسم جدًا وعايز احضر معاكم، طبعًا موافقش وقالى روح احضر في حاسبات واهتم بكليتك افضل.
روحت اشتريت ادوات وقررت انمى موهبتى مع نفسى بجانب دراستى وواحده واحده طورت موهبتى مع نفسى بدون كورسات ولا دراسه رسم.
من أول من رسمته في حياتك؟
اول بورتريه رسمته في حياتى كان طفل صغير ابن اختى، عملتله بورتريه بس طبعًا كان بامكانيات بسيطه جدًا جدًا، ولحد دلوقتى محتفظ بيه وبحب البورتريه دا جداً ودايما بقارن بينه وبين اخر بورتريه رسمته.
اصعب صوره رسمتها؟
كانت لست عجوزه بياعه خضار في السوق، شوفتها عجبتنى ملامحها فرسمتها.
و الصعب اللى كان فيها، إن وشها كله تجاعيد وتفاصيل كتيره.
ايه بيميز لوحه الموناليزا عن غيرها؟
اعمال دافينشى عموما هى الاقرب لقلبى، لوحه الموناليزا من اقرب اللوحات لقلبى، وممكن اقعد باصصلها ساعه كامله واسرح فيها من كتر جمالها، ومن حبى فيها عيدت رسمها مره تانيه بس عملت دمج بين وشها ووش الفنانه عبله كامل لانى بحبها برضو وهى الفنانه الاقرب لقلبى وسميتها عبله ليزا.
بس غيرت فيها بعض التفاصيل ورسمتها بالقهوه بدل الالوان لانى بحب الرسم بالقهوه جداً وكانت من اكتر اللوحات اللى عجبت الناس وعجبهم الدمج بين موناليزه وعبله كامل جداً وناس كتير طلبوا يشتروها منى بس انا رفضت لانى هحتفظ بيها لنفسى.
بنشوفك دايما مع فنانين كتير من الوسط الفنى، مين من الفنانين شجعك؟
كتير جدًا من الفنانين بيحبوا نوع الفن اللى بقدمه، ولما بنزل عمل بيكلمونى ويقولولى رأيهم زى شيماء سيف، مثلا من اكتر الناس اللى بيشجعونى من أول ما ابتديت.
و شريف مدكور، من اكتر الناس اللى باخد برأيهم في اعمالى وميرنا وليد وطبعا الفنان أحمد سعد اكتر حد بيدينى طاقه ايجابيه لانه هو كمان بيرسم ودايما بناخد رأي بعض في اعمالنا والعميد أحمد حسن طبعا وغاده عبد الرازق، واروى جوده كتير جدًا.
ايه طموحك في مجال فن الرسم؟
انى اطور من نفسى اكتر واكتر لانى طول الوقت بتعلم حجات جديده، وبجهز لاول معرض ليا في ٢٠٢٠ هيكون في ساقيه الصاوى.
و حلمى انى افتح أول اكاديميه لتعليم الرسم في مصر، لان مصر فيها ناس موهوبه كتير بس بيدرسوا حجات تانيه غير الرسم نفس اللى حصل معايا.
فلما افتح الاكاديميه دى هساعدهم انهم ينموا الموهبه دى بسهوله جدًا.
ايه اكتر الاعمال اللى الناس تفاعت معاها؟
اعمال كتير جداً الناس تفاعلوا معاها منهم بورتريه اللاعب محمد صلاح، والدكتور محمد مشالى الملقب بطبيب الغلابه، وبورتريه اللاعب أحمد حسن وبورتريه الفنان محمد حماقى وبورتريه الفنانه عبله كامل وبورتريه الفنانه سعاد حسنى.
مين الشخص اللى مستحيل ترسمه لصعوبه ملامحه؟
انا مستحيل ارسم نفسى، لإنى برسم بروح الشخصيه والانطباع اللى انا واخده عنها، واكيد انا مش هاخد انطباع عن نفسى وبالتالى مستحيل ارسم نفسى.
