حلت الفنانة بوسي، ضيفة على الإعلامية أسما إبراهم، في حلقة أمس الجمعة من برنامج “حبر سري” الذي يعرض عبر قناة “القاهرة والناس”.
وتحدثت بوسي، خلال اللقاء عن معاناتها قبل الشهرة، وتحديدًا فترة عملها بشارع الهرم، حيث قالت: “أنا ندمانة إن أنا أشتغلت في شارع الهرم.. هو في ميزة واحدة إن هو علمني إن أنا أتعامل مع الناس”.
وأضافت: “خلاني عندي خبرة في التعامل.. لكن أه أنا بصراحة أنا ما كنتش حابة إن أنا أبقى موجودة بشتغل في الأماكن دي.. حاجة ما تعيبنيش.. مش شبهي.. شوفت فيها حاجات كتير.. ملاهي ليلية عايزة يحصل فيها إيه؟.. ناس بتسهر.. بس أنا كنت بطلع باكل عيش.. كنت عيلة صغيرة باكل عيش مش أكتر.. بس ما كنتش عايزة أستمر فيها.. بس فيه بقى اللي بيخليكي تستمري فيه اللي جابرك ع الشغلانة.. إن انتي مش شغالة بمزاجك شغالة غصب عنك”.
وتابعت: “اتضربت واتهانت عشان انزل الشغل.. عايزاني أحب شغلي في الأماكن دي ليه؟ إذا كان انتي بتشتغليها غصب عنك.. بتروحيها إجبار.. أقولك على حاجة أنا الحمد لله إن أنا لسه فيا عقل م اللي أنا شوفته في حياتي.. يعني لو واحدة غيري أو شافت اللي أنا شوفته كان زمانها لسعت وماشية على الله في الشوارع أو مكاني في العباسية في مستشفى المجانين أو واحدة بتمشي كده في الشارع”.
