حلت الفنانة القديرة هالة صدقي، ضيفة على الإعلامية منى الشاذلي، في أحدث حلقات برنامج “معكم” الذي يعرض عبر قناة “cbc”.
وكشفت هالة، خلال اللقاء كواليس دور (صفصف) الذي قدمته في مسلسل “جعفر العمدة” وحقق نجاحًا كبيرًا، ونالت إشادة النقاد والمشاهدين بالشخصية التي لعبتها في العمل.
حيث قالت: “أنا بعتبر إن نجاحي في المسلسل ده هو نجاح لبنات جيلي كله.. هما مش مهتمين بينا وبيحاولوا باستمرار ينزلونا درجة تانية وبيحاولوا باستمرار إن هما ما يدوناش حقنا ولا يستغلوا خبراتنا ما بيعملوش كده وبيستسهلوا وعارفة اللي هو نجح في دور وكيل نيابة فيبقى طول عمره وكيل نيابة.. ويمكن دي المشكلة اللي أنا هواجها إن كل الأدوار اللي هتجيلي بعد كده (صفصف) أنا متأكدة وده اللي خلاني لما عملت (أرابيسك) ونجح النجاح الشديد ده كنت خايفة وجالي أدوار بعد كده حاسة إن فيه (توحيدة) يعني بقت الحاجات اللي بتجيلي تكملة لـ (توحيدة)”.
وأضافت: “أنا من حبي وخوفي لشخصية (توحيدة) رفضت اللون ويمكن بحكم عدم الخبرة قفلت على السكة دي خالص لإني خايفة على نجاح (توحيدة) أنا عايزة تفضل ناجحة طول الوقت.. فقولت لازم أقلب بسرعة أعمل حاجة تانية غير يمكن بعدت أوي عن منطقة الشعبي”.
وتابعت: “التشابه بيني وبين شخصية (صفصف) إن أنا مش بزوق الكلام أنا بقول الحاجة من غير فلتر بتطلع كده.. فيه طبعًا اللي عارفني تمام واللي مش عارفني بيتخض شوية بس لأ اللي في قلبي على لساني على طول”.
