كشفت الفنانة منى زكي، عن أهمية قيامها بدور في خدمة المجتمع التي تعيش فيه، وأشارت بأن موهبتها والشهرة التي حصلت عليها هى العامل الأساسي في مساعدة الآخرين.
وأكدت الفنانة، أثناء استضافتها ببرنامج “كلام نواعم”، والتي تقوم بتقديمة كلاً من “ندى باعشن، ونجلاء القحطاني، وشيرين عرفة”، والمُذاع عبر فضائية “mbc”،: “قصة إني أساعد الناس اللي حواليا إتعلمتها بسبب طبيعة شغلي، وحاسه إني كده صح وطول الوقت بحاول أعمل كده، وده بيكون من خلال عملي أو بصورة شخصية”.
وواصلت: “ودايماً حاسه إن ربنا إداني الموهبة مش بس علشان أكون مشهورة، وده بجد عشان الشهرة أرخم حاجة في شغلتنا، ولكن علشان لو في أشخاص بيحبوني، وحاسين إني بفكر صح لما بيشوفوني بعمل حاجة زي التوعية أو حابة إني أساعد فده بيكون تشجيع ليهم، وحقيقي ده نوع من رد الجميل عند الناس”.
كما تحدثت الفنانة خلال اللقاء، عن أهمية المحافظة على التوازن في طريقة تعامل الأمهات والآباء مع أولادهم، وضرورة معرفة الهدف الحقيقي من وراء مصطلح التربية الإيجابية، معلقة: “إتعلمت ده قريب، وده علشان أنا كنت شديدة وحازمة مع بنتي أكتر من الأولاد، ويمكن يكون لأنها كانت أول بنت ليا وأنا كنت صغيرة في السن ومعنديش الخبرة الكافية، وكنت مُعتقدة إن الصح صح وكل حاجة تكون بنظام، وبجد دلوقتي حاسه إني كنت سخيفة، وأنا بعتذر ليها على سخافتي”.
وكشفت منى زكي، عن رأيها في مصطلح التربية الإيجابية: “في ناس كتير بتفسره غلط، وده علشان بيكون أهم حاجة عندنا إنه يكون زي أهله وينجح وسطيهم، ولكن التربية الإيجابية هى إنك تديه ثقة بنفسه، وإنه يعرف إزاي يتعامل مع الآخرين، ومش حابة إنك تدلعيه.. بس تحاولي تكبري الحاجة الحلوة اللي جواه”.
