روى الفنان عصام السقا جانب من حياته الشخصية خلال حديثه في برنامج كلم ربنا المذاع عبر راديو 9090 ويقدمه الإعلامي أحمد الخطيب.
أصعب موقف مر على حياتي نفسيا
قال الفنان عصام السقا: أنا هحكى موقف هقوله لأول مرة في حياتي لأنه صعب عليا نفسيا.. أنا من أسرة على أد حالها ومن قرية بسيطة من مركز ملوي في المنيا.. تنسيق الثانوية العامة وداني كلية الخدمة الاجتماعية في البحيرة.. اضطرني أخرج من القرية وأفارق أمي واخواتي.. أبويا جه معايا يوصلني محطة القطر من المنيا علشان أروح البحيرة.. كان شايل معاه زوادة ليا فيها أكل ومعونة.. وقبل ما القطر يدخل المحطة شفت دموع مكتومة في عيون أبويا.. أبويا كان عارف إني لازم وأنا بدرس أشتغل علشان أصرف علي نفسي.. يعني انا مسافر ادرس واشتغل.. كنت صعبان عليه لأنه كان خايف عليا وانا لسه صغير طالع للدنيا.. كان بيخبي دموعه مني.. ركبت القطر وودعني من غير كلام.. السكوت والدموع كانوا أبطال الموقف!.
خدت أهم قرار في حياتي.. إني مش راجع البلد إلا وأنا ناجح
أضاف عصام السقا أن في اللحظة دي بصيت للسماء وكلمت ربنا من جوايا وخدت أهم قرار في حياتي.. وهو إنى مش راجع البلد الا وأنا ناجح في الدراسة.. وفى حياتى كلها!
شوف دموع أبويا من شباك القطر وفاكرها لحد دلوقت
قال عصام السقا: من شباك القطر وطول السكة بقيت أبص في السما وأكلم ربنا.. بقيت أقوله وأنا ببكي يجبر خاطري بحق دموع أبويا اللى كانت في عينيه!
الموقف ده ميعرفوش أبويا حتى الآن وهيكتشف دلوقتي بعد ما يسمعني وبعد ٢٠ سنة اني شفت دموعه اللي كان بيخبيها مني!
وتابع: حياتي بدأت بعد الموقف ده.. وابتديت الرحلة الصعبة.. قاسيت كتير وتعبت.. لكن دايما كنت سايبها على ربنا علشان يحقق طموحي وينجحني!.
اشتغلت وأنا بدرس في ماركت وعامل مكتبة وفي مصنع زيت وانترنت كافيه
استكمل عصام السقا حديث قائلا: اشتغلت وانا بدرس علشان أصرف على نفسي.. واشتغلت في سوبر ماركت وعامل في مكتبة.. وعامل في مصنع زيت.. واشتغلت في انترنت كافيه في شارع الهرم.. ولما عشت في القاهرة عشت مع خالتي في حلوان.. وبعدها اشتغلت بياع جرايد امام مسرح الزعيم في الهرم..
.. في كل الرحلة دى كنت بكلم ربنا وألح عليه إنه ميكسرنيش!
أكتر اسم بحبه من أسماء ربنا هو الجبار
أضاف عصام السقا: أكتر اسم بحبه من أسماء ربنا هو الجبار.. لأن معناه مرتبط بجبر الخاطر وجبر المكسور وجبر الضعيف.. ودايما جبر ربنا لخاطري كان موجود لأنه طبطب عليا في مواقف كتير صعبة!
واختتم حديثه قائلا: دلوقتي أقدر أقول لأبويا بعد النجاح اللي أنا فيه دموعك كانت أغلي دموع في حياتي!
