قال الإعلامي شريف مدكور: أنا إصابتي بمرض السرطان كان من أفضل الحاجات اللي حصلت في حياتي!، رغم قسوة الخبر عليا وعلى أسرتي.
طلبت من ربنا علامة أو إشارة إنه بيحبني وفوجئت بعدها بإصابتي بمرض السرطان
قال الإعلامي شريف مدكور خلال حديثه في برنامج كلم ربنا المذاع على راديو 9090 ويقدمه الإعلامي أحمد الخطيب: كنت في العمرة وحوالين الكعبة دعيت ربنا دعاء غريب جدا.. لقيت نفسي بقوله يارب اديني علامة أو اشارة انك بتحبني.. كنت منتظر اشارة حلوة.. لكن فوجئت بعدها مباشرة اني مصاب بالسرطان!
وتابع: يومها خرجت علي المشاهدين وأعلنت اصابتي بالسرطان لكن حصلت حاجة غريبة وهي إني لقيت مصر كلها انفجرت بالسؤال عني والدعاء ليا.. والملايين بتطلب من ربنا يشفيني ووجدت نفسي محاط بمشاعر حب من كل الناس!.
إصابتي بالسرطان كانت إشارة حب ربنا
أكد شريف مدكور: لما فكرت بعمق تأكدت إن الاصابة بالسرطان ده كانت إشارة حب حقيقية وعلامة كبيره.. لما شفت الناس بيعبروا عن حبهم ليا تأكدت أكتر وأكتر لدرجة اني شفت ناس من القري والمحافظات كانت بتيجي تزورني والأطفال بترسمني! وحتي الناس اللي كانوا بيتنمروا عليا راجعوا نفسهم وموقفهم مني وبقوا يدعولي!.
كنت متأكد وعلى يقين 100% إني هخف
أردف شريف مدكور قائلا: وانا بتعالج من الكانسر.. كنت بكلم ربنا وأقوله أنا متأكد وعلى يقين بنسبة ١٠٠% أني هخف وربنا هينجيني من الشدة دي.. لأنه عمره ما خذلني ولا مرة.. حتى كنت بقول للدكاترة يلا خلصوني وشيلوا الورم دا من جوايا علشان عاوز ارجع أشتغل.. وكانوا بيضحكوا ويفكروني بهزر.. لكني كنت متأكد من كل اللى بقوله!
وتابع: بحمد ربنا في كل وقت اني بقدر أتنفس وأقوم من السرير كل يوم.. وعلى رزقي ونجاحي.. كل حاجة بطلبها من ربنا بيستجيب لها!
طلبت من ربنا يرحمني من التنمر
استكمل شريف مدكور حديثه قائلا: في مرة تانيه وانا في العمرة وداخل حجر سيدنا اسماعيل كلمت ربنا وطلبت منه يرحمني من التنمر اللى الناس بتتنمره عليا لأني بزعل.. وبمجرد ما أنتهيت من صلاتي حول الكعبة واتحركت فوجئت بشخص معرفوش بيقولى: يا شريف انا اغتبتك وقلت في حقك كلام مش كويس.. من فضلك سامحني!.
مش هسامح أي حد غلط فيا أو اغتابني
قال شريف مدكور: للأسف أنا مش هسامح أي حد غلط فيا أو اغتابني أو شتمني.. ومنتظر يوم القيامة علشان نقف قدام ربنا ويحكم بيننا ومش هسامحهم!.. ربنا بالنسبة لى هو كل حاجة.. ومبخافش منه لأني بحبه لدرجة لا يتصورها أحد.. ربنا عندي هو الحبيب المحبوب..
متخافوش من ربنا
اختتم الإعلامي شريف مدكور حديثه قائلا: حابب أقول لكل الناس متخافوش من ربنا.. ربنا مبيعذبناش.. ربنا بيدينا فرص كتير علشان أحوالنا تتصلح ونتعلم منها.. لكن للأسف احنا اللى بنعذب ربنا لما بنأذي عباده..
