“بعد زواجه من فتاة صغيرة”.. محمود عامر: السن مش عائق لأن ربنا أنعم عليا بالصحة ولسه واقف على رجلي

رد الفنان القدير محمود عامر، على الانتقادات التي تعرض لها عقب انتشار صور زواجه من فتاة صغيرة على مواقع التواصل الاجتماعي خلال الساعات القليلة الماضية.

حيث قال الفنان محمود عامر، البالغ من العمر (68 عامًا)، في تصريحات صحفية: “فارق السن بيني وبين زوجتي مش عائق لإن ربنا أنعم عليا بالصحة ولسه واقف على رجلي.. وربنا لما بيقول للشيء كن فيكون.. هعترض أنا بقى على علاقة إنسانية محترمة ربنا شرعها؟!”.

وأضاف: “ربنا اختار إنه يسعدني.. وأنا الحمد لله سعيد بده.. وبتمنى الخير لطوب الأرض.. وبعتبر إن الحب هو مفتاح الفرج.. لما الواحد بيملى قلبه بالحب بينعكس ده على اللي حواليه.. ولما بيتملي قلبه بالكراهية استحالة يبان على وشه حاجة غير الحقد والكراهية”.

وتابع: “في ناس كتير محبطة.. بس أنا ذنبي إيه؟ هو أنا السبب؟ حب لغيرك الخير هيجيلك.. أنا خدت حسنات كتير أوي من كلام الناس عليا في اليومين دول”.

وعن علاقته بزوجته، قال الفنان محمود عامر: “بدأت بنظرات.. كان كلامنا كله بالعيون.. والحب سلوك وأفعال مش كلام بس.. إحنا الاتنين في حالة شغف جميلة”.

الجدير بالذكر أن الفنان محمود عامر، نشر منذ يومين صورًا من عقد قرانه وحفل زفاف على فتاة تصغره بعدة سنوات تدعى الدكتورة (رشا فرج)، عبر حسابه الشخصي على موقع التواصل الاجتماعي “فيس بوك” أثارت جدلًا كبيرًا.