ياسمين عز عن أزمة الكهرباء: هتحتاجي نور ليه وجوزك الفرعون موجود.. مولد كهربا رباني قاعد جنبك

قدمت الإعلامية ياسمين عز، عدة نصائح للسيدات للتعامل مع أزواجهن خلال فترة انقطاع التيار الكهربائي؛ نظرًا لتخفيف الأحمال بسبب ارتفاع درجات الحرارة.

حيث قالت في أحدث حلقات برنامجها “كلام الناس” الذي يعرض عبر قناة “MBC مصر”: “بمناسبة الكهربا.. إحنا ليه بنعمل مشاكل يا جماعة.. نفترض إن جوزك حبيبك عايز ينام والكهربا مقطوعة والجو حر.. هاتي مروحة يد وهوي عليه لحد ما يصحى.. وبعدين نامي انتي”.

وأضافت: “وبعدين هتحتاجي نور ليه وجوزك الفرعون موجود.. محتاجة ليه نور وعايزة نور ليه ونورك قاعد جنبك منور حياتك في الدنيا كلها.. مولد كهربا طبيعي رباني قاعد جنبك.. نوره مغطي على نور الكهربا.. النور بذات نفسه قاعد جنبك.. عايزة النور ليه؟ تأملي في الضلمة في حلاوة وجمال وبشاشة وتوهج نور فرعونك”.

وتابعت: “مفيش حاجة اسمها اطفي التكييف عشان يرتاح.. جوزك نايم.. بتريحي التكييف من التعب طب وجوزك الشقيان التعبان؟! ما بيتعبش ما ينفعش تريحيه من التعب هو كمان.. التعبان ده ما تريحيه شوية زي ما بتخافي على التكييف وتقوليلهم طفوا التكييف عشان يرتاح كمان جوزك قوليلهم طفوا الازعاج عشان يرتاح.. نقفل بقى الازعاج”.

واختتمت حديثها قائلة: “حاجة مهمة جدًا لشبابنا وفراعينا الفرعون الصغير الكبير بكل أعماره.. أرجوكم يا جماعة بليز أرجوكم أشربوا مية كتير في الحر ده.. عشان الورد بيدبل وانتوا الورد بتاعنا عايزينكوا دايمًا مزدهرين ومزهزهين ومذدهلين ومصدر الأكسجين”.