ياسمين عز: طول الوقت بتتكلمي عن روتين العناية بنفسك وعمرنا ما سمعنا عن روتين العناية بجوزك

كشفت الإعلامية ياسمين عز، في أحدث حلقات برنامجها “كلام الناس” الذي يعرض عبر قناة “MBC مصر” عن مظاهر الاهتمام والعناية بالزوج.

حيث قالت: “طول الوقت بتتكلمي عن روتين العناية بنفسك وعمرنا ما سمعنا عن روتين العناية بزوجك.. فين بقى روتين العناية بزوجك.. طول الوقت بنسمع عن روتين العناية بالبشرة وروتين العناية بشعرك طيب ماذا عن روتين العناية بجوزك.. اللي هو سبب جمال شعرك وبشرتك أصلًا.. ما بيجيش خيال قدامك وانتي في الصيدلية بتشتري الكريم أبو 300 جنيه.. ما بيجيش في بالك سهوًا كده وانتي بتحطي بخاخ كثافة الشعر اللي جيبتيه بفلوس جوزك برضه وبتبخي منه مرة صباحًا ومرة مساءً.. مين اللي جاب الحاجات دي مش فرعونك”.

وأضافت: “طيب روتين كلامك مع جوزك مفيش روتين صباحي وروتين ليلي.. يعني انتي نفس النغمة الصبح وبالليل.. ده انتي بشرتك عاملة لها روتين صباحي ورتين ليلي فجوزك حبيبك فرعونك اللي جايبلك حاجات الروتين مش عاملة له روتين صباحي وروتين ليلي.. مينفعش نفس الطريقة.. يعني حتى نبرة صوت الصبح هي نفسها بالليل؟.. فين روتين العناية يا مدام.. فين روتين الكلام مع جوزك.. إيه بشرتك أهم من جوزك ولا إيه يا مدام.. بشرتك مش هتنفعك.. لو انتي مش مهتمة ومعتنية بجوزك بشرتك مش هتنفعك”.

وتابعت: “فين أيام زمان أيام تجهيز الحمام لجوزك.. هو صحيح ليه أصلًا اختفت جملة حضرتلك الحمام يا حبيبي.. زمان ما كانش فيه فيلم أبيض وأسود ما بيتقالش فيه الجملة دي.. أنا هحضر لك الحمام.. أو حضريلي الحمام.. أو الحمام جهز.. ليه ما بقتيش تقوليله كده يا مدام؟.. ليه الراجل ما يلاقيش اللوفة في مكانها والصابون في مكانه وفرشة أسنانه جنب المعجون في مكانهم.. والمية درجة حرارتها مظبوطة.. لا هي سخنة عشان ما يتحرقش بعد الشر عليه وعلى حواليه.. ولا هي ساقعة عشان ما يجيلوش نزلة برد”.