ياسمين عز تسخر من الفتيات: تصحي الساعة 8 الصبح للميكب آرتست.. بس تصحي عشان تساعدي ماما في البيت لأ
أثارت الإعلامية ياسمين عز، جدلًا واسعًا بسبب حديثها عن تصرفات بعض الفتيات في حفل الزفاف.
حيث قالت، في أحدث حلقات برنامجها “كلام الناس” الذي يعرض عبر قناة “MBC مصر”: “في الفرح لما تيجي في الحتة بتاعت أغنية إليسا وتلفي انتي وعريسك لفة المروحة ويشيلك ويلف بيكي زي المروحة ولا كإنك كنتي لاعبة أكروبات في الصغر أو ترعرتي في دروس ومدارس الباليه”.
وأضافت: “المهم هناك في الخلفية هتلاقي فيه ست واقفة حزينة وبتبكي إحنا مفكرين إنها بتبكي على فراقك لأ مش عشان فراقك الست دي أمك الشقيانة طول عمرها هتلاقيها واقفة مندهشة باستغراب مش عارفاكي مش عارفاكي يا رانيا لسان حالها بيقولها بقى دي بنتي رانيا بنتي اللي لما كانوا يقولولها انشري الغسيل يا رانيا ترد تقول لأ يا ماما مش قادرة دايخة يا ماما.. شيلي أخوكي الصغير يا رانيا لفي بيه يا رانيا العبي معاه لعبة الدويخة تقولهم لأ ما أقدرش ألف بيه ما أقدرش أدور أصل راسي بيتصدع وبدوخ.. روحي حضري الفطار يا حبيبتي مش قادرة يا ماما أصل رجلي بتوجعني وقاعدة ع الكنبة.. مكانك ع الكنبة معلم علامة هبطان يا حبيبتي من كتر القعدة والرحرحة”.
وتابعت: “في هبوط أرضي في المكان اللي بتقعدي عليه في الكنبة وكالعادة علامة مج النسكافيه لازقة جنبك ما اتمسحتش غير ليلة الحنة يا حبيبتي أه والله.. ليلة الحنة وهما بيوضبوا كده مسحوها.. راسك بتصدع ليه بقى ما تشيلي أخوكي وتلفي بيه عندك إيه عندك شقيقة يا حبيبتي يا روح قلبي يا نن عين قلبي من جوه عندك إيه لا سمح الله ليه مصدعة طول الوقت ليه؟ وفجأة في الفرح بتتحولي للكائن الأخضر اللي بيلف حوالين نفسه ليه؟”.
وأكملت: “وبعدين انتي عيشتي عمرك كله محدش بيصحيكي بدري عشان بتصدعي وتدمعي وعينك بتوجعك بس عادي تصحي الصبح بدري الساعة 8 الصبح للميكب آرتست عشان تحطيلي رموش الفراشة المهفات على عينيكي عشان تلحقي تتصوري في عز نور الشمس الصبح على اعتبار إن الفوتوسيشن بتاعت الفرح لازم تكون في ضوء الشمس البرتقالي.. بس تصحي لماما بدري في البيت عشان تساعديها أو تسيبي الأوضة عشان توضبها لا ماما لا.. لكن رموش الفراشة وأشعة الشمس البرتقالية أه.. كل ده ماما واقفة هناك في الزاوية مش مصدقة اللي هي بتشوفه”.
