شاركت الفنانة هيدي كرم، متابعيها عبر حسابها الرسمي على موقع تبادل الصور والفيديوهات “انستجرام” بمقطع فيديو جديد تتحدث فيه عن أحد عيوب الرجال.
حيث قالت هيدي، في الفيديو: “دلوقتي أنا عندي ملحوظة.. كنت فاكرة إن أبويا هو الوحيد اللي عنده العيب ده أو جوزي هو الوحيد اللي عنده العيب ده.. أو ابني هو الوحيد اللي عنده العيب ده.. لقيت إن كل الرجالة عندهم العيب ده”.
وأضافت: “لما يبقى أبويا وجوزي وابني وصاحبي.. كتير رجالة قابلتهم في حياتي عندهم نفس العيب.. لأ يبقى العيب ده متأصل وأصيل عند الرجالة.. اللي هو إيه بقى.. اللي هو إن انتي كست لا يمكن تطلبي طلب يتنفذ إلا بعد ما تزني 3 سنين ع الطلب”.
وتابعت: “فيه حاجة بايظة عايزة تصلحيها لا يمكن تطلبي الطلب ويتنفذ لازم تزني وتزني سواء هيجيب سباك يصلح أو كهربائي أو نجار يصلحها أيا ما كان الطلب ده هياخد وقت يتراوح ما بين شهرين لسنة سنة ونص ممكن.. ليه لما الست تطلب حاجة تصليح أو صيانة تاخد هذا الوقت الهستيري عشان الراجل اللي في حياتها يستجيب ليها سواء كان جوزها سواء كان ابنها سواء كان أبوها سواء كان خطيبها سواء كان صاحبها سواء كان صديقها.. ليه ليه؟ نفسي أفهم ليه؟”.
وأكملت: “مع إنه يا جماعة ما إحنا هنزن ما إحنا هنكمل إحنا مش هنبطل نزن.. ومش هنبطل نفضل وراكوا عشان تنفذوا الحاجة اللي عايزينها.. وبعدين هي ما بتبقاش حاجة لينا يعني الست حبيبتي بتنزل تعمل لنفسها كل حاجة بس بتعطل بقى في حاجات فيما يخص صيانة العربية ممكن.. يا فيه صوت في العربية كويسة ما هي ماشية.. أيوه بس فيه صوت جامد في العجلة اللي ورا شمال.. طب طب هبقى أشوفه.. طب طب هبقى أخدها عند الميكانيكي وموت يا حمار.. حنفية الحوض بتخر لأ مش أوي بس انتي قرطي عليها.. لأ بتخر حرام دي مية.. طب حاضر هبقى أجيب السباك هبقى أغير الجلدة هبقى أشوف المحبس وهبقى دي ما بتحصلش وما بتجيش”.
وأردفت: “ليه بقى؟ ليه لما حاجة بتبوظ ما بتصلحوهاش ليه؟ على فكرة بنفضل وراكوا أصل إحنا لازم نزن.. أصل أنتوا مش فاهمين إحنا نطلع روحكوا وبعدين تقولوا إن إحنا زنانين.. طب ما تعملوا الحاجة م الأول وتنجزوا وتخلصونا وتريحونا وتريحوا نفسكوا”.
