العوضي: “الفن مش حرام.. وأنا مؤمن بالسينما النظيفة”.. ويكشف حقيقة التعاون مع زوجته ياسمين عبد العزيز في رمضان القادم
تحدث الفنان أحمد العوضي عن مصطلح “السينما النظيفة”، كما تحدث عن حقيقة التعاون بينه وبين زوجته الفنانة ياسمين عبد العزيز في رمضان القادم ٢٠٢٤.
وقال العوضي عن حرمانية الفن: “بالنسبة للناس اللي بتقول الفن حرام، كل واحد حر يقول اللي يقوله، بس أنا عن نفسي شايف إن الفن مش حرام بالمطلق، أصل الممثل ده مش بيبيع منكر”.
مضيفاً: “الممثل بإيده يخلي الفن حرام أو مش حرام، وده عموماً في كل الشغلانات، الصحفي والدكتور ممكن يخلّي شغلانته حرام أو مش حرام، لكن فيه شغلانات هي فعلاً حرام مهما حاولت تجمّلها”.
وقال العوضي عن مصطلح السينما النظيفة: “أنا مؤمن بمصطلح السينما النظيفة، إيه المشكلة إني أعمل فيلم من غير ما أخدش حياء المشاهد”.
وتابع: “في ناس بتطلع تقول إن السينما سينما ومفيش حاجة اسمها سينما نظيفة، وإن لو مش عاجبك السينما بكل حالتها يبقى سيب الشغلانة، لأ مش هسيبها، وهفضل مقتنع بالمصطلح ده”.
وأضاف: “لو مفيش سينما نظيفة يبقى مش هيكون في فرق بين السينما بتاعتنا وبين سينما المنصات العالمية، اللي بتشجع على موضوعات أنا محبش ابني أو أخويا الصغير يتفرج عليها. السينما النظيفة بتشمل موضوعات كتيرة ومتنوعة”.
أما عن التعاون مع زوجته الفنانة، قال العوضي عن خطّته لموسم رمضان 2024، أنه سينفصل فنياً عن زوجته ولكن ليس انفصالاً تاماً، وينتظروا عمل جيد جديد يجمعهما.
