ياسمين عز: مفيش حاجة اسمها كرامة بين الراجل ومراته.. وأول ما تتجوزوا تحطوا الكرامة في الدرج

وجهت الإعلامية ياسمين عز، رسالة إلى منتقديها خلال أولى حلقات الموسم الجديد من برنامجها “كلام الناس” الذي يعرض عبر قناة “MBC مصر”.

حيث قالت ياسمين، في حلقة اليوم في الخميس: “أهم حاجة أنا مش عايزاكي تخافي بالليل خالص.. مش عايزة حالة الأرق اللي بتجيلك طول ما البرنامج شغال تجيلك مرة تانية الموسم ده.. يعني مش عايزاكي كل يوم تنامي وانتي حاطة ايدك على قلبك لاجي تاني يوم أقول الكلام اللي بتفكري فيه وخايفة مني إني أقوله ما تخافيش يا مدام لإني فعلًا هاجي وأقول الكلام اللي بتفكري فيه وكل الكلام اللي انتي خايفة إني أقوله هقوله.. هقوله في البرنامج وهقول كل حاجة لن أتراجع ومش هتغير ومش هغير موقفي تحت أي ظرف وتحت أي ظروف وهفضل أقول كل اللي مؤمنة بيه ومقتنعة بيه وهفضل أقول إن مفيش حاجة اسمها كرامة بين الراجل ومراته.. وأول ما يتجوزك تحطوا الكرامة في الدرج لإن مفيش كرامة بين الزوجين”.

وأضافت: “أساسيات ثوابت في البرنامج لازم نفكر بعض بيها كل أسبوعين تلاتة.. هفضل أتكلم في الأصول وهنفضل نتكلم عن الحاجات اللي اتربينا عليها والعادات والتقاليد الجميلة اللي أمهاتنا وجداتنا اللي عمروا البيوت كانت فاتحة بيوتنا كلنا ومخليه بيوتنا كلها محبة وخير وفرح ودلوقتي للأسف طالعين يقولوا عليها دقة قديمة وموضة قديمة ويشجعوكي إنك تتطلقي من جوزك وتخربي بيتك بإيدك.. أنا عايزاكي تطمني وتتأكدي إن هذا البرنامج هيفضل زي ما هو مش هيتغير”.