أجابت الإعلامية ياسمين عز، على سؤال “أول يوم رمضان هتفطري عند مامتك ولا حماتك؟” خلال حلقة أمس السبت، من برنامجها “كلام الناس” الذي يعرض عبر قناة “MBC مصر”.
حيث قالت: “بيوت كتير هتعاني من الخناقة المصرية الشهيرة وهي هنفطر فين أول يوم رمضان؟ عند مامتك ولا عند مامتي؟ بستعجب الحقيقة وبستغرب من السؤال أصلًا وبستعجب برضه من الموضة الجديدة اللي ظهرت الكام سنة اللي فاتت بتاعت إيه بقى.. انت تفطر عند مامتك وأنا أفطر عند مامتي.. قال يعني كده بنفصل بنعمل فصل بين القوات وبنريح الطرفين.. ليه انتوا منفصلين ولا مطلقين؟ لا يا حبيبتي انتي قاعدة في بيتك مع جوزك رجلك على رجله”.
وأضافت: “يعني إيه يا مدام تدخلي على مامتك واخواتك أول يوم رمضان كده بطولك من غير فرعونك حبيبك؟ ماشي يحرسلك الطريق يأمنلك الطريق كده كده هيبة تخشي بيه بيهيبته وبزهوته يعني إيه تسمحي لنفسك ويجيلك قلب تسيبي جوزك فرعونك حبيبك أول يوم رمضان يفطر من غيرك أو يفطر عند مامته لوحده أو اخواته”.
وتابعت: “طب أخواته كل واحدة فيهم مهتمة بجوزها أو خطيبها ع السفرة وحماتك هتبقى مهتمة بحماكي الفرعون الأكبر ربنا يحفظه ويبارك في عمره وهو يا حبيبي يبقى قاعد كده لازم تكوني معاه.. فلو سمحتي من السنة ده ومن رمضان السنة دي مفيش حاجة اسمها أنا هفطر عند ماما وانت افطر عند حماتي فيه حاجة اسمها رجلي على رجلك”.
انتى ليه مزاجك يا ياسمين تِهَيِّجِى عليكى الستات و البنات كل شوية بالاقتراحات الغريبة دى؟!!