رد المطرب محمد فؤاد، على أنباء تخلي شركة روتانا للصوتيات والمرئيات عنه نظرًا لعدم نجاحه، في تصريحات تليفزيونية قائلًا: “أنا اللي أعلنت قبلها بـ 6 شهور إني مش هكمل معاهم.. خوفًا من إن حد يقول كده”.
وأضاف: “أي حد يشتغل مع محمد فؤاد كسبان.. ما حصلش.. 29 سنة نمرة واحد مبيعات.. أيًا كان أنا قايل قبلها في الجرايد بـ 6 شهور أنا مش هكمل مع روتانا بكل حب.. أنا اللي قررت ما أكملش العقد.. العملية مش إهانات وخلاص بقى”.
وتابع: “الحب الحقيقي والقلب الطيب وحبيبي يا ألبومات عندهم ما شاء الله نمرة واحد في المبيعات يعني.. وبيني وبينهم كل خير.. ناس ما قابلتش منهم غير كل حب ومعاملة طيبة ومش هشتغل معاهم تاني عشان بس تفتكري كلامي عشان كله بيفسر زي ما هو عايز”.
واستكمل: “روتانا من أنضف الشركات اللي اشتغلت معاها.. لكن أسلوبها في الشغل مش عاجبني.. ما ينفعش واحدة يتصرف عليها مليون دولار كليب ومحمد فؤاد يتحط له 200 ألف جنيه وكان هو ده السبب وأنا بعلنه لأول مرة.. ياريت إليسا دي نجمة.. ياريت نجوى كرم.. لأ ناس ممكن ما تبقاش معروفة ويتصرف ع الكليب بتاعها كده.. عرفت إن دي ميزانيات بتطلع.. يا جماعة 200 ألف جنيه هعرف أعمل بيهم أغنية إزاي؟ معتمدين إن أنت مش محتاج يعني كليب يزق لك الألبوم ولا بتاع”.
