وجهت الإعلامية ياسمين عز، خلال حلقة أمس الأحد من برنامجها “كلام الناس” الذي يعرض عبر قناة “MBC مصر” عدة نصائح للنساء.
حيث قالت: “جوزك كريم الكريم أبو الكرم سليل الأكرمين حفيد الكرماء نسي سهوًا محفظته أو فلوسه في البيت وانتوا مثلًا معزومين بره في المطعم أو بتشتروا حاجة.. حسك عينك إياكي ثم إياكي ثم إياكي تطلعي فلوس من شنطتك وتديهاله قدام الناس.. أوعي.. الحركة دي مخجلة ومهينة للراجل”.
وأضافت: “حاشا إن حد يهينه ابن الناس مرفوع الراس.. طيب هتعملي إيه في اللحظة دي؟ هنبوظ الخروجة لأ مش هنبوظ الخروجة ولا العزومة.. عندك 3 حلول عشان تحافظي على الوضع العام وكرامة جوزك قدام الناس جوزك اللي معاه فلوس أصلًا بس نسيها في البيت.. أول حاجة تروحي في مكان الدفع وتقوليلهم أنا عاملة مفاجأة لجوزي وعازماه النهارده وعايزة أحطه قدام الأمر الواقع لإنه لا يمكن يقبل إن أنا أدفع له ومش عايزاه يرفض فممكن من فضلكم أدفع الحساب وتساعدوني في ده وأفاجئه؟ يبقى انتي كده قدامهم اللي فاجئتيه وهو قدام الأمر الواقع.. ده حل”.
وتابعت: “الحل التاني من تحت الترابيزة من تحت المفرش من غير ما حد يشوف خالص تديله الفلوس من تحت مفرش الترابيزة اللي بتكون في المطاعم يعني اللي بتكون في كل المطاعم لازم يحطوا مفرش كده.. يبقى كده مش تطلعي الفلوس تديهاله من فوق الناس كلها تقولك الحق بتصرف عليه.. لا ده هو أبو الكرم خلي بالك ما تجيش انتي تمسكي الموقف ده وتعملي نفسك انتي.. لأ اوعي.. إحنا قاعدين لك”.
واستكملت: “الحل التالت.. تسيبي بشياكة شنطتك على الكرسي جنبه وتقوليله حبيبي رايحة الحمام بعد إذنك أغسل إيدي عشان أعطرها شوية وممكن تحاسب وطبعًا كلنا عارفين إنك بعد الحركة دي تعتبري نفسك حاتم الطائي وهتفضلي تسحبي وتجري من جوزك فلوس على حس الحركة دي إنك أنقذتيه لما محفظته نسيها في البيت لـ 100 سنة قدام وهتفضلي تذليه في البيت وهيندم على يوم ما نسي المحفظة”.
