ياسمين عز: تلاقي الواحدة بيتهم مفيهوش غير شاشة 32 بوصة وتطلب من عريسها شاشتين سمارت 65 بوصة
تحدثت الإعلامية ياسمين عز، في حلقة أمس السبت من برنامجها “كلام الناس” الذي يعرض عبر قناة “MBC مصر” عن المغالاة في المهور وتكاليف الزواج.
حيث قالت: “ليه كل بنت بتتعامل مع الشاب الجميل الوسيم الولد اللي جاي يتقدم لها على إنه بيل جيتس؟ بيل جيتس ده أغنى رجل في العالم وبالمناسبة بنته متجوزة مصري.. شوفي سابت كل أوروبا وأمريكا ومتجوزة المصري اللي انتي مطلعة عينه.. ما تعيشي عيشة أهلك يا أمي.. ما تعيشي عيشة أهلك يا ماما”.
وأضافت: “يعني يبقى بيتهم ما فيهوش غير شاشة بلازما واحدة 32 بوصة وتلاقيها طالبة بقى من العريس 2 شاشة ليد كيرف 65 بوصة سمارت عشان تحمل عليهم شاهد وشاهد VIP وتقعد تتفرجلي على مسلسل فريد وسيران ومسلسل أزمة منتصف العمر”.
وتابعت: “تبقى مامتها يا عيني إيديها بايشة من كتر غسيل المواعين وتقول لعريسها الغلبان أنا عايزة غسالة أطباق تاتش 11 لتر.. 12 طبق.. 3 رفوف.. يا سلام الله.. الله عليكي يا عروسة.. بأمارة إيه يا حبيبة قلبي.. مكسلة تغسلي الطبق الوحيد اللي هياكل فيه فرعونك حبيبك؟ أمال لما تعزمي بقى حماتك وأخواته وتحطي المشمر والمحمر والصيني يطلع هتعملي إيه؟”.
