كشفت الإعلامية ياسمين عز، خلال حلقة أمس السبت من برنامجها “كلام الناس” الذي يعرض عبر قناة “MBC مصر” عن عادة قديمة يقوم بها أهل المغرب عند الزواج.
حيث قالت: “بمناسبة الكلام عن العرسان.. عايزة أحكيلكوا حدوتة.. مرة كنت قاعدة مع عيلة محترمة أصحابنا.. كانت معزومة سيدة مغربية جميلة وأنا بحب السيدات المغربيات تحسها كده عندها من القشطنة واللمعنة والنضافة حاجات كده جميلة.. القشطنة دي جاية من القشطة.. تلاقي الست كده قشطة بتلمع”.
وأضافت: “وكنا بنتكلم كالعادة عن الست والراجل.. والجواز والعريس والعروسة وكل الكلام اللي بتحبوه ده.. فقالتلي سر غريب جدًا وقالتلي إنهم مش بيقولوه في المغرب لحد عادة كده عند جداتهم في المغرب.. أو حاجة تقريبًا من العادات القديمة جدًا والله أعلم”.
وتابعت: “قالتلي لما العروسة والعريس أو العروسة والمعرس على قولتهم بيقولوا على العريس معرس.. معرفش العروسة بيقولوا عليها معرسة ولا لأ.. إنهم أول ما بيتجوزوا ليلة العرس أو ليلة الزفاف أو ليلة الدخلة.. أم العريس اللي هي حماتها أو أم المعرس بتروح للعروسة البيت وتدهن رجلها عسل.. حماتها بتدهن رجلها عسل.. وتدهن جزمة ابنها العريس سمنة تكرم طبعًا النعمة بس بحكيلكوا القصة.. ويحطوا رجل العروسة اللي مدهونة عسل في جزمة العريس اللي مدهونة سمنة علشان يبقوا سمنة على عسل.. ومن هنا جه مثل إنهم بقوا سمنة على عسل”.
