رانيا يوسف: كنت بطلة “صعيدي في الجامعة الأمريكية”.. ولما بدلوا دوري واعترضت المخرج قفل السكة في وشي

كشفت الفنانة رانيا يوسف، عن أكثر موقف مهين تعرضت له خلال مشوارها الفني، حيث قالت: “في بدايتي كان فيه فيلم اسمه صعيدي في الجامعة الأمريكية.. أنا كنت ماضية الفيلم ده وكنت نازلة أصور وكان إخراج الأستاذ سعيد حامد.. وكنت نازلة أصور وكان أول بطولة لهنيدي وأحمد السقا وطارق لطفي والمجموعة كلها”.

وأضافت رانيا، في تصريحات تليفزيونية: “كنت ماضية الفيلم ده وكنت المفروض إن أنا واخدة أوردر الساعة 1 بالليل هنزل أصور.. طبعًا مكانش فيه ساعاتها موبايلات ولا أي حاجة ع التليفون الأرضي لقيت تليفون من مساعدة المخرج أنا كنت ماضية دور معين فلقيت تليفون من مساعدة المخرج إنه دورك اتغير هتبقي دور تاني خالص غير اللي انتي ماضياه”.

وتابعت: “فقولتلها إزاي دي فلانة اللي انتوا عايزين تبدلوها صورت خلاص وعملت شغلها.. قالتلي لأ ما هو حصلت عملية تبديل وهي هتعيد مشاهدها وهتبقى انتي هي وهي انتي.. فقولت لها لأ أنا آسفة مش هقدر أعمل كده لإني ماضية على دور معين فقالتلي خلاص يبقى ما تجيش.. مين فلانة غادة عادل.. فاتبدلت الأدوار واعتذرت عن الفيلم”.

واستكملت: “قولتلها لأ أنا عايزة أكلم الأستاذ سعيد حامد وعايزة أعرف بالظبط إيه اللي حصل فكلمت الأستاذ سعيد قالي طبعًا أنا كنت لسه بادية خالص ماليش اسم.. يعني محدش يعرفني خالص.. يمكن هما كانوا معروفين شوية عني.. قولت له أيوه يا أستاذ سعيد أنا ماضية دور فلانة وإزاي غادة صورت؟ قالي انتي هتعملي دورها وهي هتعمل دورك.. فقولتله لأ أنا عايزة أعمل الدور اللي أنا ماضياه.. قالي إذا كان عاجبك.. فيما معناه يعني.. فقولتله لأ أنا مش موافقة على ده.. فراح قافل السكة في وشي”.