ياسمين عز: ليه ما يبقاش عندنا طبق حلويات اسمه أبو أحمد زي أم علي كده؟ أو صوابع محمد زي صوابع زينب
ناشدت الإعلامية ياسمين عز، خلال حلقة أمس الجمعة، من برنامجها “كلام الناس” الذي يعرض عبر قناة “MBC مصر” أصحاب المطاعم بإضافة أطباق حلوى بأسماء الرجال.
حيث قالت: “حابة أعمل مناشدة لكل الفراعين أصحاب المطاعم في بلدنا الحلوة.. خدتوا بالكوا أو خدتي بالك يا مدام تحديدًا إن أول ما جوزك بيدخل معاكي المطعم ويفتح المنيو أو قائمة الطعام بيكون كده مهموم أو شارد شوية أو حاسس بحزن وألم؟ عمرك بقى انتي فكرتي تسأليه مالك يا فرعوني؟ عمرك.. لأ.. انتي بتفكري في طبق المشاوي ولا طبق الفتة اللي هتطلبيه وخلاص.. إنما الراجل زعلان وحقه يزعل وحقه علينا نراضيه”.
وأضاف: “عارفة بقى زعلان ليه أقولك أنا زعلان ليه.. لإن في قايمة الحلويات مالقاش اسمه.. إزاي الراجل اللي كنا لسه بنقول برطمان العسل مصدر الحلى.. مصنع السكر.. المادة الخام لصناعة الحلويات.. إزاي ما يلاقيش اسمه في قسم الحلويات في قائمة الطعام.. شيء أليم وموجع.. ده حتى أنواع الحلويات كلها عنصرية.. مفيش ولا حلى ولا حتة حلويات باسم الراجل.. كلها باسماء ستات.. شيء غريب وعجيب.. خد عندك أم علي.. ست.. صوابع زينب ست.. غزل البنات.. بنات وست.. شعر البنات ست.. مهلبية ست.. بسكوتة ست.. مفيش حلويات باسم الراجل ليه؟ لأ بجد ليه؟”.
وتابعت: “ليه ما يبقاش عندنا طبق حلويات اسمه أبو أحمد زي أم علي كده؟ أو صوابع محمد.. زي صوابع زينب هي مش أحسن منه في حاجة.. عيون محمود.. حواجب مصطفى.. غزل الرجال اشمعنى فيه غزل البنات.. غزل الفرعون.. مساواة بقى.. هما كمان نطالب لهم بالمساواة والحلويات الرئيسية بقى اللي تنزل عايزين طبق الفرعون الكبير.. وعايزين طبق الفرعون الصغير”.
