أثارت الإعلامية ياسمين عز، جدلًا واسعًا عقب حديثها عن قياس نسبة الجوع عند الرجال، خلال حلقة أمس الأحد، من برنامجها “كلام الناس” الذي يعرض عبر قناة “MBC مصر”.
حيث قالت: “ياريت يا مدام لما جوزك يكون جعان أو جوعان مش عايزاكي تقوليله طيب هروح أجيبلك تاكل.. لأ غلط مفيش حاجة اسمها كده لغوها.. مفيش حاجة اسمها أجيبلك تاكل وخلاص لأ مش بطة هو بنأكلها.. كده انتي مش مهتمة بتفاصيله مش فاهمة هو محتاج إيه أو بطنه عايزة إيه”.
وأضافت: “لما جوزك حبيبك تاج راسك فرعونك يكون جعان هتعملي إيه.. هنعمل الآتي هتقيسي وحدة قياس نسبة الجوع عند فرعونك.. هتقيسيها إزاي كالآتي.. هتسألي حبيبي يا ترى إيه نسبة الجوع عندك يا حبيبي.. ليه هقولك ليه لإن فيه 3 نسب بنجيب بيهم درجة الجوع عند الفرعون الصغير الكبير الراجل بنقيس بيهم الراجل بس مش بنقيس بيه حاجة تانية”.
وتابعت: “تحت الـ 50.. عند الـ 50.. فوق الـ 50.. هشرح حالًا عملي بالأمثلة.. ولنفترض مثلًا إن نسبة الجوع عند جوزك أقل من 50 % فبيقولك أنا جعان لو هو واحد بيتكلم في 10 % أو 20 % هتروحي تجيبيله ساندويتش جبنة مع كوباية شاي أو شوية بقسماط حاجة خفيفة كده تسد جوعه عشان ما نسديش نفسه قبل الغدا الوجبة الرئيسية”.
واستكملت: “ده أقل مستوى لو نسبة الجوع عند جوزك 50 % نص نص.. في الحالة دي تحطيله من نفسك طبق سلطة أو طبق تونة مثلًا أو شوية بطاطس محمرة حاجة كده وسطية عشان نأهل معدته ونأهل بطنه قبل وجبة الغدا وبرضه ما يشبعش منك بسرعة.. طيب لو جوزك حبيبك قالك نسبة الجوع عنده فوق الـ 50 % يعني 60 أو 70 أو 80 % هنا فورًا من غير كلام بتجري تحطيله الغدا صينية البطة بالبرتقال أو المحشي أو البانيه والمكرونة اللي ما بتعمليش غيرهم لما بتكوني عروسة جديدة تحطيهاله ياكل يتغدا”.
وواصلت: “دول الـ 3 نسب ولكل قاعدة استثناء.. لو نسبة الجوع عند راجلك عدت الـ 90 % أو بقت 100 %.. هنا لازم نشوف حل معاكي انتي يا هنكلم أبوكي يشوفله حل معاكي لإنك مجوعة جوزك حبيبك ومفيش مببرات.. يا هندعي كلنا ربنا يهديكي وجوزك ساعتها هيروح ياكل عند مامته اللي هي حماتك وارجعي اتقمصي وازعلي وقوليلي يا ياسمين جوزي بيحب أكل أمه حماتي أكتر مني وحماتي خدت ابنها مني يا ياسمين.. هقولك ساعتها وهرد عليكي أٌقولك ابنها بتاعها أصلًا واحمدي ربنا إنها اديتهولك”.
