دافعت السيدة سعاد، حفيدة فضيلة الشيخ الراحل محمد متولي الشعراوي، عن جدها بعد الهجوم الذي تعرضه له خلال الفترة الماضية عقب الإعلان عن تقديم مسرحية تتناول سيرته الذاتية على خشبة المسرح القومي في شهر رمضان المقبل.
وقالت حفيدة الشعراوي، في مداخلة هاتفية ببرنامج “حضرة المواطن” الذي يقدمه الإعلامي سيد علي، ويعرض عبر قناة “الحدث اليوم”: “والله إحنا في الأول وقت الهجوم ووقت ما حد بيقدم انتقادات للشيخ الشعراوي يعني كنا بنقعد نقول إن الشيخ الشعراوي مش محتاج إن حد يدافع عنه أو إن هو يطلع يكذب أي حد يطلع يتكلم لإن تاريخ فضيلة الإمام يتحدث عنه هو كفيل يدافع عنه”.
وأضافت: “بس بصراحة في الوقت الأخير لما بدأت الانتقادات تزيد والناس بدأت تتطاول على فضيلة الإمام حسينا إن إحنا من واجبنا إننا ندافع أو نطلع نتكلم نعرفهم ع الأقل إن في ناس موجودة تقدر تتكلم وتدافع عن فضيلة الإمام وصمتنا وسكوتنا وعدم الرد قبل كده مش معناه إن موقفنا ضعيف أو حاجة.. مين أصلًا يقدر ينتقد الشيخ الشعراوي أو يقدر يتكلم عنه بسوء أو بكده فهو تجاهل قبل كده يعني كنا متجاهلين الموضوع”.
وتابعت: “دلوقتي لازم بقى عشان الموضوع ما يزيدش عن حده لإن حضرتك شايف طبعًا الناس بقت تتكلم بقى كل واحد مش لاقي حاجة يعملها أو مش لاقي حاجة يقولها يتكلم عن فضيلة الإمام عشان بس يبقى عمل حاجة ويجيبوا كلام قديم إحنا اتكلمنا عنه واتكلمنا فيه قبل كده كلام كله متكرر يعني دور في أي حد بينتقده أو بيتكلم عنه دلوقتي بيقول الكلام ده من زمان كل مرة الوقت عدى عليه شوية يطلعوا يتكلموا تاني مش لاقيين حاجة يقولوها.. يعني طلعوا حاجة واحدة غلط فضيلة الإمام عملها تستاهل كل ده مفيش أي حاجة”.
واختتمت حديثها قائلة: “والحمد لله يعني محبين فضيلة الإمام كتير جدًا هما يقدروا يدافعوا عنه ولو إن هو مش محتاج حد يدافع عنه ولكن ما شاء الله محبينه موجودين في كل حتة في الأرض يعني مش في مصر بس حتى.. محبينه موجودين وسيرته العطرة موجودة وبصراحة يعني الواحد بيتبسط إن كل مرة الناس تطلع تتكلم محبينه بيطلعوا يتكلموا وسيرته ترجع تاني والناس تترحم عليه وتدعيله”.
الله يرحمه ويغفر له ويسكنه فسيح جناته