أثارت الإعلامية ياسمين عز، جدلًا واسعًا بسبب حديثها من جديد عن الصوت الشتوي، خلال حلقة أمس من برنامجها “كلام الناس” الذي يعرض عبر قناة “MBC مصر”.
ووجهت ياسمين، سؤالًا للسيدات حيث قالت: “ليه بتنادي على جوزك بدون ألقاب؟ يعني فين درس تفخيم الزوج اللي درسناه كلنا زمان فين؟ ليه نسينا الدرس ده؟ ليه نسينا الموضوع ده؟ فكروني نعمل حلقة بعنوان تفخيم الزوج.. نسيتيه أفكرك”.
وأضافت: “ليه بتنادي على جوزك كده يا محمد حاف مثلًا؟ قولي لجوزك يا أستاذ محمد.. يا أستاذ محمد تحب تشرب إيه؟ اسمعي مني تكسبي.. لو جوزك اسمه محمد قوليله باللقب ده يا أستاذ محمد.. مفيش حاجة اسمها محماااا لغوها خلاص.. ما تاكليش آخر حرف من اسم الراجل بعد إذنك.. زي ما انتي ما تقبليش إنه ياكل آخر حرف من اسمك انتي كمان ناديه باسمه كامل.. هل تقبلي مثلًا يكون اسمك سماح وينادي عليكي يقولك يا سماااا”.
وتابعت: “هتبقى ليلتها مش فايتة وهترجعي تقولي بيخوني مع واحدة اسمها سما وهو مش قصده ما انتي بتقوليله محماااا وهو بيقولك سماااا.. انتي شيلتي الدال وهو شال الحاء.. يبقى انتي كمان ما تقوليش محماااا قولي أستاذ محمد.. هتنادي عليه إزاي كالآتي يا.. نطلع بياء النداء.. أستاذ.. للتفخيم.. محمد.. للتنعيم الشديد.. تاني هتقولي الجملة إزاي لما تنادي عليه عشان جوزك يحبك وحياتك تبقى سعيدة.. يا.. أداة نداء تطلعي بيها.. وتعلي بأستاذ.. أستاذ.. للتفخيم بين قوسين.. محمد.. للتنعيم”.
واستكملت: “ممكن حد يسألني سؤال دلوقتي طب ليه بنقول يا.. ليه ما نقولش أيها الاتنين أدوات نداء خلي بالك.. لإن يا.. للقريب الحبيب.. أيها للبعيد الغريب نراجع نحو ما تراجعوش ورايا أنا عارفة بقول إيه.. فهنقول يا لجوزك حبيبك القريب الحبيب.. أستاذ معروفة لقب للتفخيم.. محمد اسم علم تنعيم شتوي هادي”.
ياسمين هانم تستحق خمس نجوم في الحلقه دي