استضافت الإعلامية ياسمين عز، خلال حلقة أمس السبت من برنامجها “كلام الناس” الذي يعرض عبر قناة “MBC مصر” النجمة رانيا يوسف، بالتزامن مع الاحتفال بليلة رأس السنة.
ووجهت مقدمة البرنامج سؤالًا لضيفتها قالت فيه: “جملة ضل راجل ولا ضل حيطة ما بتعديش عندك خالص؟”، لترد رانيا يوسف، قائلة: “لأ أنا بحب الحيطة أوي.. الحمد لله بحب الحيطة جدًا”.
وأضافت: “أنا عايزة أعرف النوعية اللي انتي بتتكلمي عليها من الرجالة جيبتيها منين؟ يعني اديني أي حد كده.. ده أنا 3 جوازات و2 مشروع جواز مالقيتش فيهم ده”، لترد عليها ياسمين عز: “محسودة.. بيحسدوكي.. صدقيني بيحسدوكي”.
وتابعت: “الراجل الحلو ده دايمًا بيبقى من بره لكن في الحياة والمسئوليات الموضوع بيختلف خالص.. لما اتنين بيتقفل عليهم باب واحد الموضوع بيختلف خالص.. الحياة الواقعية حاجة تانية خالص.. وكل المميزات اللي انتي قولتيها دي بعد فترة بتبقى عيب.. مميزاتي أنا مش قصدي أنا كرانيا.. كست.. بتشتغل ناجحة كل اللي انتي بتقوليه ده بعد فترة بتبقى عيب بيخاف مني”.
واختتمت حديثها قائلة: “بيخاف تبقي أنجحة منه.. بيخاف تبقى محبوبة عنه.. لما بتبقي حتى مستقلة ماديًا هو بيتضايق لإنه طول الوقت الراجل عايز يحس إن انتي محتاجاله بس الفرق إن هو طول الوقت عايز يحس إن انتي محتاجاله ماديًا في حين إن أنا لما بتجوز واحد مش محتاجاله ماديًا ببقى محتاجاله عاطفيًا.. ببقى محتاجاله سند في الحياة”.
