حيث قالت: “لما واحدة تكون مصاحبة واحدة وتاخد جوزها منها انتي خدتيه طيب.. خديه.. الزوجة الأولى بقى عايش معاكي بقاله كام سنة؟ سنين كتير.. فيه عشرة صح؟ فيه ولاد صح؟ وفيه تعود صح؟.. في مثل بيقولك إيه اللي يعاشر مرات أبوه توحشه أمه”.
وأضافت: “كلنا في مصر عارفين المثل ده.. اللي يعاشر مرات أبوه توحشه أمه.. فسيبيه.. سيبيه اسمعي مني سيبيه يعاشر مرات أبوه ويشوف مرات أبوه حبة قد كده عدي كده معاكي ع الزمن كده وأقعدي رجل على رجل اشربي قهوتك وقولتلك قبل كده لو انتي مظلومة الدنيا هتلف كده حقك هيجيلك لحد عندك”.
وتابعت: “في حاجات ما بيتعرفش قيمتها إلا بعد وقت.. بس اتعلمي من غلطتك.. بيقولك دايمًا إيه غرف النوم مغلقة.. عارفة غرف النوم دي اللي هي إيه مش أوض النوم اللي الزوج والزوجة بيناموا فيها لأ غرف النوم هي المنزل نفسه.. بيتك مغلق.. أنا عارفة إن إحنا في مصر حبوبين زيادة عن اللزوم وتحبي تقعدي مع جارتك تفضفضي ومع أختك تفضفضي ومع صاحبتك تفضفضي ومع مرات حارس العمارة تفضفضي أنا عارفة كلنا طيبين منا عارفة.. فضفضي بس تعالي عند جوزك خليكي لئيمة وبكررها تاني خليكي لئيمة”.
واستكملت: “في لئم انتي لما تعمليه بيكون حاجة محببة لإنه لئم طيب مش لئم شرير.. خليكي سوسة طيبة مش سوسة شريرة.. لما تداري تفاصيل جوزك ده الطبيعي بس لما وصلنا إن إحنا بنقول كل حاجة فاضطريت أسميهالك لئم فكوني لئيمة فيما يخص جوزك فيما عدا كده كوني طيبة”.
