ياسمين عز: صاحبتك في أول خناقة بينك وبين جوزك هتلاقيها بتسخنك عليه وتكلمه من وراكي وتقوله هي بتعاملك كده دي مش عارفة قيمتك
تحدثت الإعلامية ياسمين عز، في حلقة أمس السبت من برنامجها “كلام الناس” الذي يعرض عبر قناة “MBC مصر” عن تريند “البنت اللي خطفت جوز صاحبتها” المنتشر عبر مواقع التواصل الاجتماعي.
حيث قالت: “من كام يوم على نفس الكرسي نفس المكان قولت لكل بنت وكل ست بتسمعني خلي بالك من جوزك خلي بالك على جوزك خلي بالك من خطيبك من صحباتك وخصوصًا القريبين منك أوي.. وقتها إيه اللي حصل طلعت كام واحدة تقول إيه.. هو إيه اللي بتقوليه ده.. يعني إيه صاحبتي تخطف جوزي سبحان الله مفيش كام يوم عدوا على صوابعكم كام يوم مر على الحكاية ونفس الناس اللي كانوا معترضين على كلامي لما قولت ما تسيبوش صاحبتكوا مع جوزكوا في الصالون وهي تجيب العصير ومش عارف مين تجيب الشربات هما نفسهم اللي قالوا والله ياسمين عندها حق وخصوصًا بعد الحادثة الشهيرة اللي كلكم عمالين تتكلموا عليها على السوشيال ميديا إن واحدة خدت جوز واحدة صاحبتها”.
وأضافت: “الست المنهارة عشان صاحبتها انتيمتها خطفت جوزها منها واتجوزته مش كده وبس لأ دي كمان من جبروتها منزلة صورهم مع بعض من فرحها على جوز صاحبتها وكاتبة إيه بقى كاتبة أخيرًا اتحقق الحلم اللي اتأخر 10 ولا 15 ولا عشرين سنة أيًا كان.. يا نهار أبيض.. 10 سنين.. يعني ممكن تكون دي صاحبة داخلة على صاحبتها 10 سنين في البيت وهي بتحب جوزها وبتحاول تاخده أو تخطفه منها والتانية المسكينة الغلبانة ولا هي هنا وعمالة بقى تدلق بالكلام وتقولها أسرار البيت والتفاصيل وبيحب إيه وبيكره إيه والتانية بتخزن طبعًا عشان تاخده ع الجاهز”.
وتابعت: “أهو صاحبتك دي اللي في أول خناقة بينك وبين جوزك هتلاقيها بتقويكي وبتسخنك عليه بدل ما تهديكي وتخليكي تحتوي الموقف.. صاحبتك دي اللي بتكون بيتهيألك إنها في صفك وبتنصرك على جوزك وبتأيدك في قراراتك على حسابه ولكن في الحقيقة بتكون عكس كده خالص.. بتكون مش عايزاكي سعيدة.. بتكون عايزاكي دايمًا في خناقة بينك وبين جوزك.. عايزة جوزك يكرهك يشيل منك يعبي منك ومش بعيد تلاقيها من وراكي بتكلمه وبتقوله هي بتعاملك كده ليه بتعاملك كده إزاي هي مش عارفة قيمتك ولّا إيه.. هتفضل مستحملها كده لحد أمتي وتظهر بقى في دور الملاك الطيوب البريء لحد ما جوزك يقول لنفسه هو أنا إيه اللي رماني الرمية دي.. هو أنا كان فين نظري لما اختارتها وسيبت البنت دي.. ويلاقي نفسه مع الوقت بيتشد ليها ويتعلق بيها وانتي نايمة على ودانك في العسل وحاطة رجليكي في الشمس ولا حاسة بحاجة.. لحد ما تيجي الطوبة في المعطوبة وتقع الفاس في الراس وتلاقيهم متجوزين وانتي يا حبيبتي خدتي البومبة الكبيرة.. بوكس كده من بتوع تايسون”.
