إلهام شاهين تدافع عن قُبلة ابنة أختها في فيلمها الجديد: واخدة جيناتي في حاجات كتير مش في التمثيل بس

دافعت النجمة الكبيرة إلهام شاهين، عن ابنة شقيقتها إلهام صفي الدين، بعد الانتقادات التي تعرضت لها عقب عرض فيلمها الجديد “صاحبتي” في مهرجان القاهرة السينمائي، بسبب جرأة أحد مشاهده الذي تضمن قُبلة بينها وبين بطل الفيلم.

وقالت إلهام شاهين، في تصريحات صحفية: “أنا ما شوفتش الفيلم بس أكيد الفيلم متميز وبيقول حاجة قوية.. أصل لولو واخدة جيناتي في حاجات كتير مش في التمثيل بس.. مش في الفن فقط لكن في الاهتمام والثقافة وحب السينما عمومًا”.

وأضافت: “يعني من وهي صغير كانت تغني وتعمل كليب كده لنفسها وهي اللي تصور وهي اللي تمنتج وهي اللي تخرجه كانت صغيرة جدًا في ابتدائي يعني في المدرسة.. فأنا حاسة إن هي موهوبة من وهي طفلة بس مش عارفة اتجاهاتها إيه”.

وتابعت: “مثلت معايا وهي صغيرة في مسلسل نعم مازلت أنسة.. وعملت آخر حلقة كانت بطولة الطفلة الصغيرة المخرج اتفاجئ قالي أنا مش مصدق دي بتحفظ أحسن منكوا وبتحس كويس أوي وكان أول مرة قولتله إيه ده انت بتتكلم بجد؟ وفعلًا الحلقة كانت مسمّعة أوي”.

واستكملت: “فهي عندها الاستعداد بس هي حسستني إنها بتحب الإخراج بتحب التصوير بتحب المونتاج يعني ما كانتش بتقولي إنها ممكن تمثل.. والتمثيل عمومًا مش بالجمال أنا الحقيقة ضد هذه المقولة اللي بيعرف يحس ويصدق ويعيش الحكاية بجد يعني يسيب نفسه للحياة الأخرى اللي أنا بمثلها.. يعني أخرج من إلهام خالص وأعيش حياة الشخصية بكل مفرداتها بشكلها بمشيتها بكلامها بطريقتها بشعرها بوشها يعني الفن ده مش مسألة سهلة ومحتاج لازم موهبة كبيرة.. طبعًا الدراسة بتثقل ده بس الموهبة هي الأساس”.

وعرض للفنانة إلهام صفي الدين، مؤخرًا فيلم “صاحبتي” لأول مرة في الشرق الأوسط وشمال أفريقيا ضمن فعاليات مهرجان القاهرة السينمائي الدولي، بعد مشاركته في مسابقة “آفاق” للأفلام القصيرة بالدورة الـ 79 من مهرجان فينسيا السينمائي الدولي.

“صاحبتي” بطولة: مارك حجار، وإلهام صفي الدين، وفاضل الجارحي، من تأليف وإخراج: كوثر يونس.