ياسمين عز لنساء مصر بمناسبة كأس العالم: جوزك قلبه واجعه إن منتخبنا مش في البطولة.. فمتبقيش انتي والزمن ومنتخب السنغال عليه
وجهت الإعلامية ياسمين عز، خلال حلقة الأمس من برنامجها “كلام الناس” الذي يعرض عبر قناة “MBC مصر” نصائح للسيدات طوال فترة كأس العالم 2022 التي سوف تنطلق اليوم الأحد، في قطر.
وقالت ياسمين: “لو مالكيش في الكورة حاولي تحسسيه إنك بتشاركيه اهتماماته.. لو حسستي جوزك وقت الماتشات إنك بتشاركيه اهتماماته وقتها جوزك هيكون أسعد واحد في الدنيا.. اسأليه مثلًا قبل الماتش كده بتشجع منتخب مين يا حبيبي؟ وأقعدي جنبه اتفرجي وشجعي انتي كمان بس من غير مبالغة ولا أفوره.. ومين غير ما تسأليه مين لابس إيه والحكم ده بيعمل إيه.. شوفي هو بيعمل إيه وأعملي زيه بالظبط.. لكن قوانين اللعبة وترتيب المجموعة والحاجات اللطيفة دي نبقى نسأل عنها بعدين لما الماتشات والمونديال يخلص”.
وأضافت: “حاجة تانية مهمة جدًا.. المخرجين في كاس العالم بيركزوا ع المدرجات زي ما بيركزوا برضه ع الملعب واللاعيبة.. فكل شوية هتلاقي الكاميرا راحت على بنت حلوة قاعدة من البرازيل.. ست جميلة من الاكوادور.. واحدة بترقص م المكسيك.. فلما تلاقيه باصص للشاشة ومبتسم ده من قبيل إنه مبسوط بالحدث كليًا وبالكرة عمومًا وبالإخراج مش معجب بالبنت أو الست اللي قاعدة في المدرج.. فأرجوكي بلاش تقوليله مالك بتبص كده ليه.. معجب بيها ولا إيه”.
وتابعت: “الراجل أساسًا حزين وقلبه واجعه إن منتخبنا مش في البطولة.. فمتبقيش انتي والزمن ومنتخب السنغال عليه.. أهم حاجة وقت الماتش تعيشيه المود.. والخمس دقايق الأخيرة في كل شوط خليكي ناصحة بقى تيجي في الوقت ده تحديدًا وتطلبي من جوزك اللي انتي عايزاه لو طلبتي عينيه هيديهالك عشان يخلص ويعرف يركز في الماتش.. وغالبًا هو في الخمس دقايق الأخيرة في الماتش بيكون مش سامعك أساسًا مش شايف حد فأطلبي يا ست الكل واحلمي زي ما انتي عايزة هتلاقيه ما بيعترضش على أي حاجة.. ده أكتر وقت هتلاقيه في الحياة مسالم فيه”.
