قامت الفنانة الجميلة إلهام شاهين، بالتحدث عن تجربتها في الانتاج السينمائى، وأكدت على أنها خسرت الكثير من الأموال في هذا المجال بسبب عدم استطاعتها على التسويق.
وصرحت الفنانة، على هامش حفل افتتاح الدورة الـ 44 من مهرجان القاهرة السينمائى الدولى، أثناء استضافتها ببرنامج “مساء dmc”، والذى يُذاع من خلال فضائية “dmc”، وقالت:ـ “من الممكن إنى أخوض تجربة الانتاج مرة ثانية، وده علشان أنا بحب العند والموضوع كله عامل زى لعبة القمار.. تخسرى في فيلم فتقولى هعمل فيلم آخر علشان أعوض الخسارة وهكذا أعمل فيلم تالت، وبجد أنا بحب السينما”.
وكشفت إلهام عن أسباب خسارتها من الانتاج السينمائى، وقالت:ـ “بنتج كويس بس مشكلتى إنى مكنتش عارفة أسواق، وده علشان أنا معنديش علاقات في التسويق وإزاى أبيع الفيلم، وبجد الموضوع مش سهل وعاوز دراسة وأنا معرفتش أعمل ده، وراحت فلوسى ومعرفتش أرجع حاجة منها في الانتاج”.
وتحدثت الفنانة خلال اللقاء، عن أنها لن تتواجد في السباق الرمضانى القادم 2023، بعد أن كانت ستشارك في مسلسل “حضرة العمدة” بجانب الفنانة الجميلة روبى.
وقالت إلهام:ـ “مش هكون موجودة على الشاشة في رمضان القادم، وده علشان أنا بيبقى نفسى يكون معايا جميع الحلقات، ومش بعرف أصور وأنا معايا 6 أو 7 حلقات من 30 حلقة، وعلشان أشتغل كويس لازم أكون فاهمة الدور اللى هعمله وحجمى فيه قد إيه من اللى حواليا، ويارب أقدر من دلوقتى إنى أحضر لرمضان 2024”.
وأما بخصوص السينما أكدت الفنانة:ـ “فى فيلم (بنات صابرة) موجود دلوقتى بس الموضوع مُتوقف حالياً، وقصة الفيلم تدور حول زواج القاصرات وختان الإناث”.
وفى نهاية اللقاء، أكدت الفنانة عن بالغ سعادتها بالمهرجان وعودة الفنان حسين فهمى لرئاسة المهرجان، وتذكرت الدورات السابقة التى ترأسها وحضر فيها الكثير من نجوم الفن، وكان على رأسهم الفنان العالمى “عمر الشريف”.
