علقت الإعلامية مروة صبري، على عودة المطربة شيرين عبد الوهاب، لزوجها السابق الفنان حسام حبيب، خلال ظهورها في حلقة أمس من برنامجها “قعدة ستات”، حيث قالت: “أعتقد إن بعد كل اللي إحنا شوفناه ده حسام حبيب ده مظلوم والله.. الناس كلها تقولك ما هي اللي غلطانة إنها رجعت له لأ انت اللي غلطان حسام حبيب انت اللي غلطان إن انت وافقت ترجع لشيرين تاني.. انت حر بعد كده في اللي هيتعمل فيك.. بعد كده لما يتقال عليك إنك بتاخد فلوس وعارفها مصلحة عشان هي شيرين عبد الوهاب وانت مطرب لسه يعني اسمك مش قدها أوي استحمل”.
وأضافت: “لما يتقال عليك إنك سرقت عربيات وإنك بتدمر حياتها وحياة بناتها وضربت بناتها وضربتها استحمل.. لما أي حاجة بعد كده تطلع تتقال عليك ما تبقاش تزعل خلاص انت حصل فيك مرة واتنين وتلاتة واربعة وفي الآخر رايح تاني تكتب كتابك على شيرين.. يعني أنا بصراحة مستغربة”.
وتابعت: “الإفيه الأعلى بقى تعالوا نروح لليڤيل الأعلى عشان الواحد حاسس إنه قاعد في برنامج عالم سمسم.. أبو حسام حبيب بالمناسبة هو رافض إن هو يعمل مداخلات مع أي حد لكن هو قاعد بيلعب برضه مع الجمهور على السوشيال ميديا.. اللي حصل إن أبو حسام حبيب زي ما انتوا عارفين طبعًا من أسبوعين كان عمال يقوله انت تربية ست ودي كلمة استفزت ستات كتير واستفزت مصر كلها والعالم كله.. انت تربية ست وانت جيت خدت مني مليون ونص وانت مش عارف بتعمل إيه ودمرت حياة شيرين كان واقف مع شيرين ضد ابنه أوكيه؟ وانت عملت وانت سويت وانت لا ابني ولا أعرفك وطلع بعد كده حسام حبيب رد عليه وقاله شرف ليا إني تربية ست.. تعالوا شوفوا النهارده أبو حسام حبيب بيقول إيه.. مش عارفة أقول إيه والله العظيم من كتر الضحك.. قالك إيه بقى يا جماعة مبروك لحسام وشيرين رجوعهم وأتمنى إنكوا تجيبولي حفيد بسرعة”.
واستكملت: “انتوا ردوا انتوا بجد ردوا.. هو إحنا مين ولا إحنا فين ولا إحنا بنهزر ولا إحنا بنلعب ولا انتوا بتستخفوا بعقل الجمهور لا انتوا بتعملوا إيه.. يعني حاجة من الحاجات اللي هي الغريبة.. طب يا عم خليك بعيد.. انت راجل كبير وسنك كبير يعني وكان ليك موقف وكنت رافض شيرين في الأول وكنت بتحاربها دلوقتي انت مبسوط وبتبارك الجوازة دلوقتي انت فرحان.. دلوقتي انت شايف إن هاتولي حفيد بسرعة وقاعد بتدافع عن حسام حبيب.. أنا مش قادرة أصدق”.
