ردت الإعلامية ياسمين عز، خلال حلقة أمس الأحد، من برنامجها “كلام الناس” الذي يعرض عبر قناة “MBC مصر”، على منتقدي برنامجها الذين وصفوها بأنها تعمل على تنفيذ أجندة خارجية.
وقالت ياسمين: “بلاش يبقى فيه طريقة بلدي بلدي أوي ونصطاد في المية العكرة ونقول أي كلام مع أي كلام.. هذا البرنامج اجتماعي بحت يدعو إلى لم شمل الأسرة المصرية وبإذن الله نلم شملها.. يدعو إلى إننا نفتكر أمنا وجدتنا كانوا بيعملوا إيه ونعمل زيهم.. ليه؟ لإن ببساطة بيت أمهاتنا وبيت جدتنا فضلوا معمرين وعايشين سعدا ومتهنيين.. اللي جه بعد كده جديد علينا فبنحاول ننفضه كده من حوالينا.. شوية تراب وغبار هننفضه ونرجع تاني زي الفل”.
وأضافت: “من فات قديمه تاه.. مفيش مثل طلع من الناس الطيبين كده اعتباطًا لا طلع من حاجات شافوها في الحياة.. فأرجع وأقول يا اللي سمعاني ويا اللي سامعني ويا اللي سامعيني هذا البرنامج برنامج اجتماعي ترفيهي رياضي فني أسري.. بيقدم مادة ممتعة ومادة مفيدة.. دايمًا يقولك إيه فيد المشاهد بس امتعه”.
واستكملت: “اللي إحنا بنقوله هنا كله بعيد كل البعد عن الحاجات اللي ممكن حد يحاول إنه يدخلنا فيها.. هو أنا بتكلم في البلكون وداخلة البيت محدش هيشوفني.. انت بتتكلم ع الشاشة يعني كل حاجة موجودة”.
