ياسمين عز: فين أيام ما كانت الست بتدي لجوزها الحتة الكبيرة من الفرخة

تحدثت الإعلامية ياسمين عز، في حلقة أمس الجمعة، من برنامجها “كلام الناس” الذي يعرض عبر قناة “MBC مصر” حول الخيانة الزوجية وأسبابها.

وقالت ياسمين، متسائلة: “ليه معظم الستات بتتغير بعد الجواز ليه الاهتمام والحب والدلع بيختلف ليه مبقتش تقوله بحبك ليه ما بتتصلش بيه وهو في الشغل عشان تقوله وحشتني ليه وهو نازل شغله الصبح مش بتعدله ياقة القميص وتقوله بلاش تلبس القميص ده وألبس الجاكيت ده عشان تكون أشيك.. ليه لما يكون متأخر بالليل في شغل أو اجتماع أو حتى خارج مع صحابه ع القهوة مش بتكلمه تقوله أنا مش هنام غير لما ترجع وأطمن عليك.. ليه كل الحاجات اللي بتعملها معاه زمان أو وقت الخطوبة مبقتش تعملها بعد الجواز؟”.

وأضافت: “مرة تانية بكرر بعض السيدات أو بعض الستات مش كلهم ولو إن اللي أنا بتكلم عليهم دلوقتي هما اللي بقوا الأغلبية للأسف لكن مبحبش يعني التعميم أنا بقول بعض السيدات.. كل حاجة فيها الوحش وفيها الحلو.. أنا نفسي الستات اللي بيسمعوني دلوقتي يحاولوا يجاوبوا على الأسئلة دي في سرهم ويصارحوا نفسهم بالحقيقة”.

وتابعت: “أعرف ستات لما أجوازهم يكونوا نازلين الشغل مش بيقولولهم بقى ترجعوا بالسلامة ولا يقولولهم محتاجين حاجة ولا ربنا معاك يا حبيبي ولا أعملك إيه ع الغدا النهارده ولا بيعبروهم أساسًا وكإن لسان حالها بيقولها يلا في ستين سلامة والمركب اللي تودي.. والله موجودين وأعرفهم.. طيب طبيعي بعد كده لما ينزل الشارع أو يروح الشغل ويلاقي واحدة بتبتسم له مش بعيد بقى يعجب بيها أو يتعلق بيها وترجعي بعد كده تشتكي وتقولي هي الرجالة عينها زايغة ليه.. ما هو شايف بوز قد كده نهار وليل قدامه”.

واستكملت: “وبعدين أول ما يرجع بدل ما تقوله عملت إيه النهارده يا حبيبي في الشغل وتطبطب عليه كده وتاخده بالحضن تقوله وحشتني. تلاقيها بقى قاعدة قامطة دماغها وفاتحة سارينة الشكاوي الشكاءة البكاءة راسي وجعاني وإيدي تعباني والعيال هلكوني ودماغي مصدعة وبعدها تقوله أنا مش قادرة اتكلم ولا افتح بؤي بأي كلمة بعد ما قالت كل ده أنا مش قادرة اتكلم ومحدش يكلمني النهارده ده إذا ما رجعش أساسًا البيت ولقاها نايمة وباعتاله رسالة ع الموبايل بتقوله أبقى طلع حلة السبانخ م التلاجة سخنها.. أو أبقى اشتريلك أي حاجة تاكلها وانت جاي م الشارع عشان ما عملتش حسابك النهارده في الغدا”.

واختتمت كلامها قائلة: “في سؤال أنا عايزة أسأله.. انتي كست ليه لما حد يجي من أهلك الولايم تشتغل والمحمر والمشمر والأصناف والأشكال والألوان تظهر.. وفي الأيام العادية الكوسة ما تتقورش البتنجان ما يتحشيش ولا أي حاجة تتعمل للراجل الهفتان الشقيان اللي طالع عينه.. طالع عينه طبعًا في الشغل عشان مين عشانك وعشان البيت وعشان ولاده.. عايزة أقول فين أيام ما كانت الست بتدي لجوزها الحتة الكبيرة من الفرخة وتاكل بقيتها هي والعيال فين والله العظيم الأيام دي؟!”.