حلت الفنانة والراقصة الاستعراضية دينا، ضيفة على الإعلامية سالي عبد السلام، مقدمة برنامج “المتوحشة” الذي يذاع عبر قناة “النهار” خلال شهر رمضان الجاري.
وتحدثت دينا، عن بداية مشوارها الفني والصعوبات التي واجهتها أثناء عملها كراقصة ورد فعل والدها الذي قاطعها وقتها، حيث قالت: “كان عايزني أفضل في فرقة رضا وأفضل في الفنون الشعبية انتي عارفة من منطلق إن الأب دايمًا بيخاف على بناته وإن شكل البدلة بيوحي للناس إن تصرفاتك مش كويسة.. لبس الفرقة محتشم انما لما بتبقي رقاصة شرقي بترقصي في أماكن تانية غير المسارح”.
وأضافت دينا: “مفيش مسرح هنا في مصر بيعرض رقص شرقي فالأب بيبقى قلقان لأن مش كل واحد بيبقى فاهم إنك لأ مؤدبة وإنك لأ متربية وإنك بتعملي ده عشان بتحبيه إلا بعد سنين أنا أثبتت ده بس بعد سنين طويلة جدًا”.
وتابعت دينا: “أبويا بالنسبة لي أنا كنت أحب بنت ليه وهو أحب حد ليا في عيلتي.. فكنت ممكن أقول الرجالة وحشين بس مش أبويا.. وفي رجالة وحشين وفي كويسين طبعًا.. وأبويا كان عنده عين شايفة قدام أنا مش شايفة أنا عايزة أعمل اللي أنا عايزة أعمله دلوقتي بس هو كان خايف عليا من كلام الناس”.
وعن ندمها على شيء حذرها والدها منه ولكنها فعلته قالت دينا: “أنا كنت بحب الرقص على إني أندم على حاجة بابا قال عليها لأ.. ده مخدتوش عند ده خدته حب.. أنا كنت بحب فعلًا الرقص أكتر من إني استنى رأي حد فيه وكنت اتضايق لو حد قال بيتكلموا ع الرقاصات وحش أقوله لأ ما تتكلمش ع الرقاصات وحش وكنت بدافع بشكل فظيع يعني”.
يذكر أن آخر أعمال الفنانة دينا، مسلسل “حي السيدة زينب” الذي عرض في أكتوبر الماضي.
“حي السيدة زينب” بطولة: سوسن بدر، ودينا، وأحمد وفيق، ومحمود عبد المغني، وليلى عز العرب، وحسام داغر، من تأليف: أحمد صبحي، وإخراج: محمد النقلي.
