حلت الإعلامية الكبيرة هالة سرحان، ضيفة على الإعلامية أسما إبراهيم، مقدمة برنامج “حبر سري” الذي يذاع عبر قناة “القاهرة والناس”.
وتحدثت هالة، خلال الحلقة عن الأخطاء التي وقعت فيها على الهواء قائلة: “اتقطع عليا بالغلط أحلى غلطة في الحياة.. يوم نتيجة انتخابات الرئاسة بين مرسي وشفيق.. قولتله هات يا ابني النتيجة نشوف النتائج الأولية.. ببص في الورقة لقيته متقدم روحت عاملة كده (حركة تبدي بها استيائها) أماني المونتيرة قالتلي انتي ع الهوا أنا كنت قاطعة عليكي”.
وأضافت هالة: “تاني يوم بقى اليوتيوب أو الصفحة الرئيسية بتاعت جوجل مذيعة مصرية تبدي استيائها على الهوا وما قالوش اسمي حتى.. وحطولي الكليب بتاع الحركة اللي عملتها ودي اشهر قطعة أظن جابت 3 مليون أو حاجة زي كده.. لعلمك أنا ما بعملش الحركة دي في حياتي خالص لكن دي طلعت لا ارادية على حسب المستوى اللي أنا بقراه يعني”.
وتابعت: “لكن الحمد لله ربنا طلعنا من الأيام السودا والسنة السودا دي بمعجزة.. وأدانا أعظم هدية الرئيس عبد الفتاح السيسي ده هدية من السما وزعقلنا نبي والحمد لله إحنا مصر ماشية بخطى حسيسة إلى مستقبل احنا ابتدينا نشوفه وابتدينا نعيشه.. إحنا عمرنا ما حسينا كشعب مصري واحنا عايشين إن بيحصل انجازات التغيير مذهل ومبهر”.
واستكملت حديثها قائلة: “والله العظيم أنا بقعد كده أبص أنا كنت بروح مدينة الانتاج الاعلامي ففي حتة مشوار طويل في الطريق بتاع 10 كيلو كده من غير عمود نور واحد فكنا بنخلص برنامج متأخر وبنرجع بنترعش بالليل في الضلمة لو حصلنا حاجة لو العربية وقفت لو طلعوا علينا ناس يعني كانت حاجة مخيفة جدًا أنا دلوقتي بقولك لما بمشي وبشوف كمية الأنوار والطرق الواسعة والحارات الكبيرة لأ يعني مفيش عمود مطفي.. إحنا كان سلو بلدنا كان طول ما انتي ماشية إذا لقيتي عمود بيطفي ويولع يبقى كويس”.
وأشارت إلى أن مصر بها ثروة رقمية الآن على جميع المستويات، بالإضافة إلى أن مصر متجهة نحو الرقمنة ويجب أن نعيش عهد الرقمنة ونقبله وننفذه ونعلم نفسنا عشان مصر نفسها تتنقل وتقدر تواكب التقدم العالمي.
